ஷஃபாஅத் ஓர் நற்பாக்கியம்

[ ‘நல்ல மனிதன் செய்திருக்கும் நல்லமல்கள் சுவனத்துக்கு உரிமை பெற போதுமானதாக இருக்காது. அல்லாஹ்வின் அருட்கொடைகளை நீர் எண்ணினாலும் எண்ணி மாளாது.’ என்று திருக்குர்ஆனின் (14:34), (16:18) வசனங்கள் கூறுகின்றன. எண்ணியே முடிக்க முடியாதபோது, அவ்வனைத்துக்கும் நன்றி செய்ய எவ்வாறு முடியும்? எனவே எவரும், இறைவனுக்கு முழுக்க நன்றி செலுத்தியிருக்க முடியாது. அல்லாஹ்வின் தயவும், தாராளத் தன்மையும் இல்லையாயின் சுவனம் செல்ல முடியாது.

நபிகள் நாயகம் ஸல்லல்லாஹு அலைஹி வஸல்லம் அவர்கள் கூறியுள்ளார்கள், ‘அன்று சிலர் அல்லாஹ்வின் அருளால் சுவனம் செல்வார்கள். சிலர் ஷஃபாஅத்தால் சுவனம் செல்வார்கள்.’  (அறிவிப்பாளர்: ஹளரத் இப்னு அப்பாஸ் ரளியல்லாஹு அன்ஹு, நூல்: தப்ரானி, பைஹகி)]

‘நல்ல காரியத்தில் சிபாரிசு செய்பவருக்கு அதன் பாக்கியத்தில் பங்குண்டு. தீய காரியத்தில் சிபாரிசு செய்பவருக்கு அதன் தீமையில் பங்குண்டு. அல்லாஹ் ஒவ்வொரு பொருளையும் கண்காணிப்பவனாக உள்ளான்.’ (அல் குர்ஆன் 4 : 85)

அரிசிக்கடன் முதல அரசியல் சலுகை வரை அனைத்தும் இன்று சிபாரிசைக் கொண்டே நடைபெறுகிறது. காரியம் ஆக வேண்டும் என்றால் எவரையாவது சிபாரிசு பிடித்துத்தான் ஆகவேண்டியுள்ளது.

நம்மால் முடியுமானால், தாராளமாக சிபாரிசு செய்ய முன் வரவேண்டும். அதற்கு நன்மையும் கிடைக்கும். அதை விடுத்து தீய காரியத்துக்கு நாம் சிபாரிசு செய்வோமேயானால் அந்த தீமையின் பாதிப்பு எப்படியாவது நம்மை வந்து சேரும்.

உதாரணத்திற்கு நமது தேர்தல் முறையை எடுத்துக் கொள்வோம். வாக்கு சீட்டின் பொருள் என்ன? ‘உங்களை ஆள்வதற்கு யாருக்கு நீங்கள் சிபாரிசு செய்கிறீர்கள்?’ என்று கேட்பதாகும்.

வாக்களிக்கும்போது நல்ல மனிதர்களுககு நாம் சிபாரிசு செய்தால் நாம் நற்பயனை அடைவது கண்கூடு. தீயமனிதர்களுக்கு சிபாரிசு செய்யும்போது தீயவிளைவை நாம் சந்திக்கத்தான் செய்கிறோம்.

நல்ல சிபாரிசு

நல்ல சிபாரிசு என்பது ஒரு நல்ல அமல் என்பதை நபிகள் நாயகம் ஸல்லல்லாஹு அலைஹி வஸல்லம் அவர்கள் விளக்கியுள்ளார்கள்.

‘ஒரு சமயம் நபிகள் நாயகம் ஸல்லல்லாஹு அலைஹி வஸல்லம் அவர்கள் பள்ளிவாசலில் நின்று கொண்டிருந்தார்கள். ஒரு ஏழை அவர்களின் உதவியை நாடி நின்றார். தன் அருகில் இருந்த ஒரு தோழரைப் பார்த்து அண்ணலார் ஸல்லல்லாஹு அலைஹி வஸல்லம் அவர்கள் ‘நண்பரே! இவருக்கு நான் கொடுப்பதற்கு நீங்கள் சிபாரிசு செய்யுங்கள்’ என்றார்கள். அந்த நண்பர் சிரித்து விட்டார். ‘யா ரஸூலல்லாஹ்! அவர் தனது தேவையை தங்களிடம் கேட்டுவிட்டார். நீங்களோ இல்லையென்னு சொல்ல மனம் இல்லாதவர்கள். எனவே நிச்சயம் நீங்கள் அவருக்குக் கொடுக்கப் போகிறீர்கள். உங்கள் இருவருக்கிடையில் நான் வேறு சிபாரிசு செய்ய வேண்டுமா?’ என அந்த நண்பர் விணவினார்.

‘இல்லை! நண்பரே! சிபாரிசு நீங்கள் செய்யும்போது, நான் கொடுப்பதால் எனக்குக் கிடைக்கும் நன்மை அளவு உங்களுக்கும் கிடைக்கும்’ என அண்ணலார் ஸல்லல்லாஹு அலைஹி வஸல்லம் பதிலளித்தார்கள். அந்த நன்மையின் வாக்களிப்பு நம்பகத்தனமானதுதான் என்பதை விளக்குவதற்காக ‘அல்லாஹ் தன்னுடைய தூதரின் நாவின் வழியாக, தான் விரும்பும் ஆணையை வெளிப்படுத்துகிறான்’ என்று கூறினார்கள். (அறிவிப்பாளர்: அபூ மூஸா ரளியல்லாஹு அன்ஹு, நூல்: புகாரி)

இவ்வுலக காரியங்களில் பிற மனிதர்களுக்கு சிபாரிசு செய்வதால் நன்மை கிடைப்பதைப் போன்றே பிற மனிதர்களுக்காக நாம் துஆ செய்வதும் நன்மை பயக்கக்கூடியதே! அதுவும் ஒருவகை சிபாரிசு தான் என்பதை அண்ணலார் ஸல்லல்லாஹு அலைஹி வஸல்லம் விளக்கியுள்ளார்கள்.

தனது சகோதர முஸ்லீமுக்காக, அவர் இல்லாத வேளையில் துஆ செய்தால், அந்த துஆ நிச்சயம் ஏற்றுக்கொள்ளப்படும். துஆ செய்யும் உமக்கு அது போன்ற பாக்கியம் கிடைக்கும்’ என வானவர் கூறுவார். (அறிவிப்பாளர்: ஹளரத் அபூ தர்தா ரளியல்லாஹு அன்ஹு, நூல்: முஸ்லிம்)

இந்த நபி மொழியின் கருத்துக்கிணங்க நமது தேவைகள் நிறைவேற்றப்படுவதற்கு சிறந்த வழி, இரண்டு நபர்கள் ஒன்று சேர்ந்து கொண்டு ஒருவர் மற்றவருக்காக துஆ செய்வதாகும்.

தீய சிபாரிசு

சிபாரிசு செய்வதன் மூலம், பாவத்துக்கும் பழிக்கும் துணை போவதை அண்ணலார் ஸல்லல்லாஹு அலைஹி வஸல்லம் கடுமையாக எச்சரித்துள்ளார்கள்.

‘யூதப்பெண்ணொருத்தி திருடிவிட்டாள். அந்தக் குற்றம் நிரூபணமாகிட்டது. அவள் செல்வக் குடும்பத்தைச் சார்ந்தவள். அவளைக் கைவெட்டிலிருந்து தப்பிவிக்க வேண்டும் என்பதற்காக, அவளின் குடும்பத்தார் ஹளரத் உஸாமா பின் ஸைத் ணுயனை ரளியல்லாஹு அன்ஹு அவர்களை சிபாரிசு செய்யக் கோரினார்கள். அவரும் அண்ணலார் ஸல்லல்லாஹு அலைஹி வஸல்லம் அவர்களிடம் பரிந்துரை செய்தார்.

அப்போது அண்ணலார் ஸல்லல்லாஹு அலைஹி வஸல்லம் கடுமையாக சினம் கொண்டார்கள். ‘அல்லாஹ்வின் தண்டனைக்குரிய குற்றங்களுள் ஒரு குற்றத்திலா நீர் சிபாரிசு செய்கிறீர்! உங்களுக்கு முன் வாழ்ந்தவர்கள் அழிந்தொழிந்து போனதெல்லாம் இதுபோன்ற நடவடவடிக்கையால் தான். அவர்களில் சிறப்பானவர் திருடினால் பேசாமல் விட்டுவிடுவார்கள். வசதியற்றவர் திருடினால் தண்டணையை நிறைவேற்றுவார்கள். என் ஆன்மாவை தன் கைவசம் வைத்திருக்கும் அல்லாஹ்வின் மீது ஆணையிட்டுக் கூறுகிறேன் முஹம்மதுவின் மகள் ஃபாத்திமா திருடினாலும் அவள் கையையும் வெட்ட நான் தயங்க மாட்டேன்’ என நபிகள் நாயகம் ஸல்லல்லாஹு அலைஹி வஸல்லம் அவர்கள் கூறினார்கள். (அறிவிப்பாளர்: ஆயிஷா ரளியல்லாஹு அன்ஹா, நூல்: புகாரி)

அண்ணலார் ஸல்லல்லாஹு அலைஹி வஸல்லம் அவர்களின் சிபாரிசு

நல்ல சிபாரிசு பற்றி நாம் ஆய்வு செய்கின்றபோது, நபிகள் நாயகம் ஸல்லல்லாஹு அலைஹி வஸல்லம் அவர்களுக்கு நாம் பெரிய அளவில் நன்றிக்கடன் பட்டிருப்பது தெரியவருகிறது. நமது பிழைகள் பொறுக்கப்படுவதற்கு அவர்கள் சிபாரிசு செய்யமாறு ஐந்து இடங்களில் இறைவன் ஆணையிடுகின்றான். மற்றொரு இடத்தில் ஸலவாத்தும் சொல்லச் சொல்கிறான்.

பெருமானார் ஸல்லல்லாஹு அலைஹி வஸல்லம் அவர்களின் சிபாரிசு நமக்குத் தேவை என்பதை அந்த ஆணைகள் அறிவிக்கின்றன. இது அண்ணலார் ஸல்லல்லாஹு அலைஹி வஸல்லம் அவர்கள் நமக்குச் செய்யும் உயர்தரமான சிபாரிசு ஆகும்.

‘அவர்கள், தங்களுக்கே அநியாயம் செய்து கொண்டார்களாயின், உம்மிடம் அவர்கள் வரவேண்டும். (உம் முன்னால் வைத்து) அவர்கள் அல்லாஹ்விடம் பிழை பொறுக்கத் தேட வேண்டும். அவ்வாறானால், அவர்கள் அல்லாஹ்வை மன்னிப்பவனாகவும், கருணை புரிபவனாகவும் காணுவார்கள்.’ (அல்குர்ஆன் 4:64)

‘அவர்களை நீங்கள் மன்னித்து விடுங்கள். அவர்களுக்காக இறை மன்னிப்பையும் தேடுங்கள். காரியங்களில் அவர்களின் ஆலோசனையையும் கேளுங்கள்.’ (அல்குர்ஆன் 3:159)

‘(உங்கள் சபையில் அமர்ந்திருக்கும் போது); அவர்கள் தங்கள் தேவைக்காக சென்றுவர அனுமதி கோருவார்களாயின், அவர்களில் நீங்கள் விரும்புவோருக்கு அனுமதி வழங்குவீர். அவர்களுக்காக அல்லாஹ்விடம் பிழை பொறுக்க பிரார்த்தனை செய்திடுவீர். நிச்சயமாக அல்லாஹ் மன்னிப்போனும், அருள்புரிவோனுமாக உள்ளான்.’ (அல்குர்ஆன் 24:62)

‘அறிந்து கொள்வீர்! வணக்கத்துக்குரியவன் அல்லாஹ்வைத் தவிர எவருமில்லை. உமது குற்றத்துக்காகவும், அனைத்து முஃமினான ஆண்கள், பெண்களுக்காகவும் பிழை பொறுக்கத் தேடுங்கள். நீங்கள் உலா வரும் இடத்தையும், ஒதுங்கும் இடத்தையும் அல்லாஹ் நன்கறிவான்.’ (அல்குர்ஆன் 47:19)

‘அந்தப் பெண்களிடம் உடன்படிக்கை செய்யுங்கள். அவர்களுக்காக அல்லாஹ்விடம் பிழை பொறுக்கத் தேடுங்கள். நிச்சயமாக அல்லாஹ் மன்னிப்போனும், அருள் புரிவோனுமாவான்.’ (அல்குர்ஆன் 60:12)

‘அவர்களின் செல்வங்களிலிருந்து ஜகாத் தொகையை எடுத்துக் கொள்வீர். அது அவர்களைத் தூய்மைப்படுத்தும், அவர்களின் செல்வங்களையும் சுத்தப்படுத்தும். அவர்களின் மீது ஸலவாத்தும் கூறிடுவீர். உமது ஸலவாத் அவர்களுக்கு அமைதியைத் தரவல்லதாகும். அல்லாஹ் செவியேற்பவனும், அறிந்தவனுமாவான். (அல்குர்ஆன் 9:103)

மறுமையில் நபி ஸல்லல்லாஹு அலைஹி வஸல்லம் அவர்களின் ஷஃபாஅத்

மறுமையில் நபிகள் நாயகம் ஸல்லல்லாஹு அலைஹி வஸல்லம் அவர்கள் செய்யவிருக்கின்ற ஷஃபாஅத் என்பதும் ஒரு தலை சிறந்த சிபாரிசு ஆகும்.

ஆனால் அத்தகைய ஷஃபாஅத் மறுமையில் கிடையாது என்ற சிலர் மறுத்துரைப்பார்கள்.

‘அந்த நாளை பயந்து கொள்ளுங்கள். எந்த ஆன்மாவும், எந்த ஆன்மாவுக்கும் எதையும் தடுத்து விட முடியாது. அந்த ஆத்மாவிடமிருந்து சிபாரிசும் ஏற்றுக் கொள்ளப்படாது. ஈட்டுத்தொகையும் பெறப்பட மாட்டாது. அவர்கள் உதவியும் செய்யப்பட மாட்டார்கள்..’ (அல்குர்ஆன் 2:48)

இவை போன்ற வசனத்தை ஆதாரமாகக் கொண்டே அவர்கள் அவ்வாறு ஷஃபாஅத் கிடையாது என்று கூறுவார்கள். ஆனால் ஷஃபாஅத் உண்டு என்பதாக அதே திருக்குர்ஆனின் எட்டு வசனங்கள் கூறுகின்றன. எனவே ஷஃபாஅத் கிடையாது என்று காணும் வசனம் இறை மறுப்பாளர் சம்மந்தப்பட்டதாகும் என்பதாக திருக்குர்ஆன் விரிவுரையாளர்கள் அனைவரும் விளக்கம் தருகின்றனர். எனவே மேற்கண்ட வசனத்துக்கு இறையை மறுக்கும் எந்த ஆத்மாவுக்கும் எதையும் தடுத்துவிட முடியாது என்றே பொருள் கொள்கின்றனர்.

ஷஃபாஅத்தை எடுத்துரைக்கும் அல்குர்ஆனின் எட்டு வசனங்கள் இதோ:

‘அவனது உத்தரவின்றி அவனிடம் சிபாரிசு செய்பவர் யார்?’ (அல்குர்ஆன் 2:225)

‘அவன் திருப்தியடைந்தவர் அல்லாமல் மற்றவர்களுக்கு அவர்கள் சிபாரிசு செய்ய மாட்டார்கள்.’ (அல்குர்ஆன் 21:28)

‘அவனிடம் உத்தரவு பெற்ற பின்னே தவிர சிபாரிசு செய்பவர் எவருமிலர்.’ (அல்குர்ஆன் 10:3)

‘அந்த அருளாளனிடம் உடன்படிக்கை பெற்றவர் தவிர வேறு எவரும் சிபாரிசுக்கு உரிமை பெற மாட்டார்.’ (அல்குர்ஆன் 19:87)

‘அந்நாளில் அந்த அருளாளன் அனுமதியளித்தவர் தவிர மற்றவரின் சிபாரிசு பயனளிக்காது.’ (அல்குர்ஆன் 20:109)

‘அவன் எவருக்கு அனுமதி வழங்கினானோ, அவர்கள் தவிர மற்றவர் அவனிடத்தில் செய்யும் சிபாரிசு பயனளிக்காது.’ (அல்குர்ஆன் 34:23)

‘அவனை விடுத்து அவர்கள் வணங்குகிற தெய்வங்கள் சிபாரிசு செய்ய உரிமை பெற மாட்டார்கள். உண்மையைக் கொண்டு சாட்சியம் பகர்ந்தவர் தவிர’ (அல்குர்ஆன் 43: 86)

‘அவர்களின் சிபாரிசு, எதையும் பலன் தராது. அல்லாஹ், அவன் விரும்பியோருக்கு உத்தரவு வழங்கிய பின்;பே தவிர.’ (அல்குர்ஆன் 53:26)

ஷஃபாஅத் இன்றேல்...

‘நல்ல மனிதன் செய்திருக்கும் நல்லமல்கள் சுவனத்துக்கு உரிமை பெற போதுமானதாக இருக்காது. அல்லாஹ்வின் அருட்கொடைகளை நீர் எண்ணினாலும் எண்ணி மாளாது.’ என்று திருக்குர்ஆனின் (14:34), (16:18) வசனங்கள் கூறுகின்றன. எண்ணியே முடிக்க முடியாதபோது, அவ்வனைத்துக்கும் நன்றி செய்ய எவ்வாறு முடியும்? எனவே எவரும், இறைவனுக்கு முழுக்க நன்றி செலுத்தியிருக்க முடியாது. அல்லாஹ்வின் தயவும், தாராளத் தன்மையும் இல்லையாயின் சுவனம் செல்ல முடியாது.

தத்துவமேதை இமாம் கஸ்ஸாலி ரஹ்மதுல்லாஹி அலைஹி அவர்கள் தனது ‘இஹ்யா’ எனும் நூலில் ‘அல்லாஹ் நமக்குத் தந்திருக்கின்ற ‘கண்’ணுக்கு நன்றி சொல்லவே நமது ஆயுள் போதாது’ என்று கூறுகிறார்கள்.

நபிகள் நாயகம் ஸல்லல்லாஹு அலைஹி வஸல்லம் அவர்கள் கூறியுள்ளார்கள், ‘அன்று சிலர் அல்லாஹ்வின் அருளால் சுவனம் செல்வார்கள். சிலர் ஷஃபாஅத்தால் சுவனம் செல்வார்கள்.’ (அறிவிப்பாளர்: ஹளரத் இப்னு அப்பாஸ் ரளியல்லாஹு அன்ஹு, நூல்: தப்ரானி, பைஹகி)

பனூ இஸ்ராயீல் காலத்தில் நடந்த ஒரு நிகழ்வு

நபிகள் நாயகம் ஸல்லல்லாஹு அலைஹி வஸல்லம் அவர்கள் பனூ இஸ்ராயீல் காலத்தில் நடந்த ஒரு நிகழ்வை எடுத்துரைத்தார்கள்.

‘ஒரு வணக்கசாலி தன் வாழ்நாள் முழுவதும் ஒரு மலையில் தவத்தில் ஈடுபட்டிருந்தார். அங்கிருந்த மாதுளை மரத்திலிருந்து தினமும் ஒரு கனியை பறித்து உண்பார். அருகிலுள்ள நீர்ச் சுனையிலிருந்து நீர் அருந்தவார். அதுவே அவரின் உணவாக இருந்து வந்தது. ஒருநாள் அவரும் மரணமடைந்தார். ‘எனது தயாளத்தால் சுவனம் செல்வாயாக!’ என்று அல்லாஹ் அவரிடம் கூறினான்.

அவருக்கு அது பேரதிர்ச்சியாக இருந்தது. ‘யா அல்லாஹ்! அப்படியானால் வாழ்நாளெல்லாம் நான் செய்த அமல்?’ என்று அல்லாஹ்விடம் அவர் வாதாடினார்.

உடனே அல்லாஹ்வக்கு கோபம் வந்துவிட்டது. ‘இவனை நரகத்துக்கு இழுத்துச் செல்லுங்கள்’ என்று அல்லாஹ் மலக்குகளுக்கு உத்தரவிட்டான். மலக்குகள் அவரை நரகத்துக்கு இழுத்துச் சென்றனர். செல்லும் வழியில் அவருக்கு தாகம் ஏற்பட்டது. தண்ணீர் கிடைக்குமாவென அவர் சுற்றுமுற்றும் பார்த்தார். அப்போது ஒருவர் தண்ணீர் விலை கூறி விற்றுக் கொண்டிருந்தார். அவரை அழைத்து தனக்கு தண்ணீர் தருமாறு கேட்டார் அந்த வணக்கசாலி.

‘இதற்கு உரிய விலை நீர் தரமாட்டீர்!’ என்று தண்ணீர் வியாபாரி கூறினார். ‘அப்படி என்னதான் விலை?’ என்று இவர் கேட்கவும், ‘நீர் வாழ்நாள் முழுவதும் செய்த நல்லமல்களின் நன்மை அனைத்தையும் இதற்கு விலையாகத் தரவேண்டும்’ என்று வியாபாரி கூறினார். அதை செவியற்று அதிர்ச்சியடைந்த வணக்கசாலி தனக்கு தண்ணீர் வேண்டாம் என்று கூறி மறத்துவிட்டார். ஆனால், அவர் நரகத்தை நெருங்க, நெருங்க அவரின் தாகம் அதிகரித்தது. நாவறண்டது. தண்ணீர் அருந்தாமல் அதற்குமேல் ஒரு அடி கூட எடுத்து வைக்க முடியாத நிலையை உணர்ந்தார். தன் அமல் அனைத்தையும் கொடுத்தாவது தண்ணீர் வாங்கி அருந்த வேண்டும் என்ற அவர் முடிவு செய்தார்.

அப்போது அந்த வழியாக சென்ற தண்ணீர் வியாபரியைக் கூப்பிட்டு தனது நன்மைகள் அனைத்தையும் கொடுத்து தண்ணீர் வாங்கி அருந்தினார். அப்போது அல்லாஹ் அவரை அழைத்தான். ‘உனது அமல் என்ன விலை போனது?’ என்று அவரிடம் கேட்டபின்பு – ஒருதடவை தண்ணீர் அருந்தும் அளவுதான் உனது அமல்களின் விலை என்றால், நான் காலமெல்லாம் சுனையிலிருந்து நீர் தந்தேனே! அவற்றுக்கு விலையான அமல் எங்கே? நான் தினமும் தந்த மாதுளம் பழத்துக்கு அமல் எங்கே?’ என்று அல்லாஹ் கேட்டான். அல்லாஹ்வின் கேள்விக்கணைகளுக்கு பதில்கூற முடியாமல் அந்த தவசாலி தத்தளித்தார்.

அவருக்கு உண்மையை உணரச் செய்த அல்லாஹ் அவரை மன்னித்து ‘நீ எனது அருள்கொண்டு சுவனம் செல்’ என்று மீண்டும் உத்தரவு பிறப்பித்தான். ‘ஆம் இறiவா! உனதருள் கொண்டே நான் சுவனம் செல்கிறேன்!’ என்று தவசாலியும் விண்ணப்பித்தார்.

அல்லாஹ்வின் அருளின்றி எவரும் சுவனம் செல்ல முடியாது என்பது உண்மையானால், அந்த அருளைப் பெருவதற்கு சிபாரிசு இன்றியமையாததாகிறது. கண்மணி நாயகம் ஸல்லல்லாஹு அலைஹி வஸல்லம் அவர்கள் சிபாரிசு செய்வதில் முதலாம் இடத்தை வகிக்கிறார்கள். அவர்கள் செய்யப்போகும் சிபாரிசுக்கு ஐந்து ஆதாரங்கள் பிரபலமானவை.

1. நபிமார்கள் தயக்கம் காட்டியபோது

‘மறுமை நாளில் எல்லா மக்களும் உயிர்த்தெழப்படும்போது எல்லோரும் என்ன செய்வது? என்று தெரியாமல் கையைப் பிசைந்து கொண்டு நிற்பார்கள். சூரியன் தலை உச்சிக்கு அருகாமையில் தகதகத்துக் கொண்டிருக்கும். தங்களின் கேள்வி கணக்குகளை முடித்துக் கொண்டு சுவனமோ, நரகமோ சென்று விட்டால் தேவலாம் என்று தோன்றும். ஆனால் விசாரணை நடப்பதற்கான அறிகுறியையே அவர்கள் காணமாட்டார்கள்.எனவே எல்லோருமாகச் சேர்ந்து நபி ஆதம் அலைஹிஸ்ஸலாம் அவர்களிடம் செல்வார்கள்.

‘எங்கள் தந்தையே! உங்களை அல்லாஹ் சிறந்தவரென தேர்ந்தெடுத்துள்ளான். (அல்குர்ஆன் 3:33) எனவே எங்களுக்காக அல்லாஹ்விடம் சிபாரிசு செய்யுங்கள்’ என்று அவர்கள் கூறுவார்கள்.

‘தடுக்கப்பட்ட கனியை நான் உண்டது பற்றி அல்லாஹ் விசாரிப்பானே! என்று நான் பயந்து கொண்டிருக்கிறேன். எனவே நபி நூஹ் (அலைஹிஸ்ஸலாம்) அவர்களிடம் செல்லுங்கள்’ என்று நபி ஆதம் அலைஹிஸ்ஸலாம் கூறிவிடுவார்கள். அதன்பின் அவர்கள் நபி நூஹ் அலைஹிஸ்ஸலாம் அவர்களிடம் வருவார்கள்.

‘சிறப்புமிக்க நபியே! இந்த பூமியில் உன்னை நம்பாதவர்களை விட்டு வைக்க வேண்டாம்! என்று தாங்கள் செய்த துஆவை அல்லாஹ் ஏற்றுள்ளான் (அல்குர்ஆன் 71:26) எனவே எங்களுக்காக அல்லாஹ்விடம் சிபாரிசு செய்யுங்கள்’ என்று அவர்கள் கூறுவார்கள்.

‘வெள்ளப் பிரளயத்தில் உலகமெல்லாம் அழிந்து கொண்டிருந்தபோது மக்களைப் பற்றிக் கவலைப்படாமல் நான் என் மகனைக் காப்பாற்ற வேண்டுமென அல்லாஹ்விடம் முறையிட்டேன். அது பற்றி அல்லாஹ் விசாரிப்பானே! என்று நான் அஞ்சிக் கொண்டிருக்கிறேன். எனவே நபி இப்ராஹீம் (அலைஹிஸ்ஸலாம்) அவர்களிடம் செல்லுங்கள் என்று நபி நூஹ் அலைஹிஸ்ஸலாம் கூறிவிடுவார்கள்.

அதன்பின்; மக்கள் நபி இப்ராஹீம் அலைஹிஸ்ஸலாம் அவர்களிடம் செல்வார்கள்.

‘சிறப்புமிக்க நபியே! உங்களை அல்லாஹ் நேசராக ஆக்கிக் கொண்டுள்ளான். (அல்குர்ஆன் 4:125) எனவே நீங்கள் எங்களுக்காக சிபாரிசு செய்யுங்கள்!’ என்று கூறுவார்கள்.

‘நான் உலகில் வாழும்போது மூன்று தடவைகள் பொய் சொல்லியிருக்கிறேன். அவற்றைப் பற்றி அல்லாஹ் விசார்ப்பானே என்று நான் கவலையடைகிறேன். எனவே நபி மூஸா (அலைஹிஸ்ஸலாம்) அவர்களிடம் செல்லுங்கள்’ என்று நபி இப்ராஹீம் அலைஹிஸ்ஸலாம் அவர்கள் கூறிவிடுவார்கள்.

அவர்கள் மூஸா அலைஹிஸ்ஸலாம் அவர்களிடம் சென்று ‘சிறப்புமிக்க நபியே! உலகிலேயே அல்லாஹ் உங்களிடம் உரையாடியிருக்கிறான். (அல்குர்ஆன் 4:164) எனவே எங்களுக்காக நீங்கள் அல்லாஹ்விடம் சிபாரிசு செய்யுங்கள்’ என்று கூறுவார்கள்.

‘உலகில் வாழும்போது நான் ஒரு கொலை செய்திருக்கிறேன். அந்தக் கொலை பற்றி இறைவன் விசாரிப்பானே என்று அஞ்சிக் கொண்டிருக்கிறேன். எனவே நபி ஈஸா (அலைஹிஸ்ஸலாம்) அவர்களிடம் செல்லுங்கள்’ என நபி மூஸா அலைஹிஸ்ஸலாம் பதிலுரைப்பார்கள்.

அவர்கள் நபி ஈஸா அலைஹிஸ்ஸலாம் அவர்களிடம் சென்று ‘நீங்கள் பிறவிக் குருடர்களுக்கு பார்வை வழங்கியிருக்கிறீர்கள். தொழுநோயாளியைக் குணப்படுத்தியிருக்கிறீர்கள். (அல்குர்ஆன் 5:110) எனவே எங்களுக்காக நீங்கள் அல்லாஹ்விடம் சிபாரிசு செய்யுங்கள்’ எனக் கூறுவார்கள்.

''என்னுடைய சமுதாயத்தவர் என்னையும் ஒரு கடவுளாக நினைத்து வணங்கியது பற்றி இறைவன் என்னிடம் விசாரணை செய்யவிருக்கிறான்.'' (அல்குர்ஆன் 5:116) நான் அதுபற்றி கவலையடைந்துள்ளேன். எனவே நபி முஹம்மது ஸல்லல்லாஹு அலைஹி வஸல்லம் அவர்களிடம் செல்லுங்கள்’ என நபி ஈஸா அலைஹிஸ்ஸலாம் அவர்கள் கூறிவிடுவார்கள்.

இறுதியில் அனைவரும் ஹளரத் முஹம்மது நபி ஸல்லல்லாஹு அலைஹி வஸல்லம் அவர்களிடம் வருவார்கள். ‘அண்ணலே, பெருமானாரே! நீங்கள் மனித குலத்தின் தலைவராக இருக்கிறீர்கள். எங்களுக்காக அல்லாஹ்விடம் சிபாரிசு செய்யுங்கள்’ என்று கூறுவார்கள். உடனே நபிகள் நாயகம் ஸல்லல்லாஹு அலைஹி வஸல்லம் அவர்கள் ஸஜ்தாவில் வீழ்ந்து அல்லாஹ்விடம் சிபாரிசு செய்வார்கள். அல்லாஹ் அவர்களின் சிபாரிசை ஏற்றுக் கொள்வான். (அறிவிப்பாளர்: அனஸ் ரளியல்லாஹு அன்ஹு, அவர்கள், நூல்: புகாரி, முஸ்லிம்)

2. அண்ணலார் ஸல்லல்லாஹு அலைஹி வஸல்லம் அவர்களின் மனநிறைவு எப்போது?

‘உமது இறைவன் உமக்கு பின்னர்வழங்குவான். அப்போது நீர் மனநிறைவு கொள்வீர்’ என்ற (அல்குர்ஆன் 93: 5) திருவசனம் பெருமானார் ஸல்லல்லாஹு அலைஹி வஸல்லம் அவர்களின் சிபாரிசு பற்றிதாகும். அதாவது உம்மத்துகள் குறித்த அவர்களின் சிபாரிசை அல்லாஹ் ஏற்றுக் கொள்ளும் போது தான் அவர்கள் மனநிறைவு கொள்வார்கள்.

ஹளரத் அப்துல்லாஹ் பின் அம்ருபின் அல்ஆஸ் ரளியல்லாஹு அன்ஹு, அறிவிக்கிறார்கள், ‘ஒருநாள் நபிகள் நாயகம் ஸல்லல்லாஹு அலைஹி வஸல்லம் அவர்கள் இப்ராஹீம் அலைஹிஸ்ஸலாம, ஈஸா அலைஹிஸ்ஸலாம ஆகிய இருவரையும் நினைவு கூர்ந்தார்கள். அவ்விருவரும் தனது சமுதாயத்தவரில் வழி தவறிப்போனவர் குறித்து கவலை தெரிவித்த திருவசனங்களையும் அண்ணலார் ஸல்லல்லாஹு அலைஹி வஸல்லம் ஓதினார்கள். (எனது இறiவா! அவர்கள் மக்களில் அதிகமானோரை வழிதவறச் செய்து விட்டார்கள். அவர்களில் என்னைப் பின்பற்றியோர் என்னைச் சார்ந்தோராவர். என்னைப் பின்பற்றாதோர் என்னைச் சாராதோராவர். நிச்சயமாக நீ மன்னிப்பவனும், அருள்மிக்கவனுமாவாய்) (நீ அவர்களை வேதனைப்படுத்தினால் நிச்சயமாக அவர்கள் உனது அடியார்கள். அவர்களை வேதனைப்படுத்தும் உரிமை உனக்குள்ளது. நீ அவர்களை மன்னித்துவிட்டால் நிச்சயமாக நீ கண்ணியமிக்கோனும், ஞானமிக்கோனுமாவாய்).

இவ்விரு வசனங்களையும் நினைவு கூர்ந்த அண்ணலார் ஸல்லல்லாஹு அலைஹி வஸல்லம் அவர்கள் தனது சமுதாயத்தோரில் வழி தவறிச்செல்வோர் பற்றி கவலைப்பட்டு அழுதார்கள். அப்போது அல்லாஹ் ஹளரத் ஜிப்ரயீல் அலைஹிஸ்ஸலாம் அவர்களை அழைத்து அண்ணலார் ஸல்லல்லாஹு அலைஹி வஸல்லம் அவர்களின் அழுகைக்கான காரணம் என்ன என்பதை அறிந்து வரக் கோரினான். பின்னர் அண்ணலார் ஸல்லல்லாஹு அலைஹி வஸல்லம் அவர்களை அழைத்து ‘உமது சமுதாயத்தோர் குறித்து உம்மை நாம் மனநிறைவு அடையச் செய்வோம்! உமக்கு எந்தக் கவலையும் வேண்டாம்! என்று அல்லாஹ் கூறுகிறான்’ (நூல்: முஸ்லிம்)

3. வீட்டோ பவர்

நபிகள் நாயகம் ஸல்லல்லாஹு அலைஹி வஸல்லம் அவர்கள் நவின்றுள்ளார்கள்: ‘ஒவ்வொரு நபிக்கும் தனித்தனமை பெற்ற ஒரு துஆ செய்யும் உரிமையை அல்லாஹ் வழங்கியிருந்தான். அந்த துஆவில் எதைக் கேட்டாலும் தருவதாக வாக்களித்திருந்தான். எல்லா நபிமார்களும் அந்த உரிமையைப் பயன்படுத்தி விட்டார்கள். ஆனால் எனது சமுதாயத்துக்கு சிபாரிசு செய்வதற்காக அதை நான் சேமித்து வைத்திருக்கிறேன்’ (அறிவிப்பாளர்: ஹளரத் அனஸ் ரளியல்லாஹு அன்ஹு, நூல்: புகாரி)

4. பெரும்பாவம் செய்தோருக்கும்

நபிகள் நாயகம் ஸல்லல்லாஹு அலைஹி வஸல்லம் அவர்கள் நவின்றுள்ளார்கள்: ‘எனது சமுதாயத்தில் பெரும்பாவம் செய்தோருக்கும் எனது சிபாரிசு கிடைக்கும்’ (அறிவிப்பாளர்: ஹளரத் அனஸ் ரளியல்லாஹு அன்ஹு, நூல்: அபூதாவூத்)

5. உலகப் பேரழிவு

நபிகள் நாயகம் ஸல்லல்லாஹு அலைஹி வஸல்லம் அவர்களும், நண்பர்களும் தபூக் யுத்தத்திலிருந்து திரும்பும் வழியில் ‘அல்ஹஜ்’ அத்தியாயத்தின் இரு திருவசனங்கள் அருளப்பெற்றன. நபிகள் நாயகம் ஸல்லல்லாஹு அலைஹி வஸல்லம் அவர்கள் நண்பர்களுக்கு அதை ஓதிக் காட்டினார்கள்.

‘மனித குலத்தோரே! உங்கள் இறைவனை அஞ்சிக் கொள்ளுங்கள். உலகப்பேரழிவின் அமளி மிகப் பயங்கரமான நிகழ்வாகும். அதைக் காணும் நாளில் குழந்தைக்குப் பாலூட்டிக் கொண்டிருக்கும் தாய் குழந்தையை விட்டும் பாராமுகமாகி விடுவாள். கருவுற்றிருக்கும் பெண் அரைகுறையாகக் குழந்தையைப் பிரசவித்து விடுவாள். மக்களையெல்லாம் போதையானவர்களைப் போன்று நீர் காண்பீர். ஆனால் அவர்கள் போதைப்பொருள் உபயோகித்தவர்களல்லர். எனினும் அல்லாஹ்வின் வேதனை மிகக் கடுமையானதாக இருக்கும்.’

இவ்விரு திருவசனத்தையும் ஓதக்கேட்ட நண்பர்கள் அதிர்ச்சியடைந்தார்கள். அந்த நாளின் சிரமங்களைப் பற்றியே சிந்திக்க ஆரம்பித்தார்கள். இதனால் பயணம் தடைபட்டது. நபிகள் நாயகம் ஸல்லல்லாஹு அலைஹி வஸல்லம் அவர்கள் நண்பர்களின் நிலை கண்டு பிரயாணத்தை நிறுத்தக் கூறினார்கள். அவர்கள் அந்த இடத்திலேயே இரவில் தங்கினர்.

அதிகாலையில் நண்பர்களின் நிலை கண்டு அண்ணலார் ஸல்லல்லாஹு அலைஹி வஸல்லம் துணுக்குற்றார்கள். இரவு அடுப்பு பற்றவைக்கப்படவில்லை. நண்பர்கள் தூங்கியதாகவும் தெரியவில்லை. நண்பர்களிடம் வந்து, ‘நண்பர்கள! நான் இரவு அறிவித்த திருவசனம் உங்களையெல்லாம் கலக்கமடையச் செய்து விட்டதாக நினைக்கிறேன். இரவில் உங்களில் எவரும் உணவுண்டதாகத் தெரியவில்லை. தூங்கியதாகவும் தெரியவில்லை. அந்த நாள் பற்றிய செய்தி இன்னுமிருக்கிறது. அந்த நாளில் அல்லாஹ் ஹளரத் ஆதம் அலைஹிஸ்ஸலாம் அவர்களை உயிர்த்தெழுப்பவான். கண் விழித்த ஹளரத் ஆதம் அலைஹிஸ்ஸலாம் அவர்கள், ‘யா அல்லாஹ்! நரகத்திற்கு எத்தனை பேர்களை அனுப்பப் போகிறாய்? சுவனத்துக்கு எத்தனைப் பேர்களை அனுப்பப் போகிறாய்?’ என்று கேட்பார்கள். ‘ஆயிரத்துக்கு ஒருவரை சுவனத்துக்கு அனுப்பப் போகிறேன்’ என்று இறைவன் கூறுவான்.

அண்ணலார் ஸல்லல்லாஹு அலைஹி வஸல்லம் அவர்களின் இந்த மொழியைக்; கேட்ட நண்பர்கள் மேலும் அதிர்ச்சியடைந்தனர். ‘மன் யன்ஜு யா ரஸூலல்லாஹ் (அப்படியானால் யார் தான் நரக விடுதலை பெற முடியும்?)’ என்று கூறி அழுதனர்.

நண்பர்கள் கவலையுறுவதைக் கண்ட பெருமானார் ஸல்லல்லாஹு அலைஹி வஸல்லம் அவர்கள் ‘கவலையடையாதீர்கள் இறுதி நாளில் புற்றீசல்போல் வெளிவர இருக்கின்ற ‘யஃஜூஜ் - மஃஜூஜ்’ என்ற இனத்தோரும் மனிதர்களாகவே கணக்கிடப்படுவர். அவர்கள் அனைவரும் நரகத்துக்குச் செல்வர். ஆதலால் ஆயிரத்தில் ஒருவருக்கு சுவனம் என்பது அதிர்ச்சியளிக்கும் விகிதாச்சாரமல்ல! எனவே நீங்கள் கவலையடையாதீர்கள்’ என்று கூறியவர்கள் மேலும், ‘சுவனத்துக்கு செல்பவர்களில் நான்கில் ஒரு பகுதியினர் நம்மவராக இருப்பார்கள்’ என நான் எதிர்பார்க்கிறேன்!’ என்றார்கள்.

பெருமானார் ஸல்லல்லாஹு அலைஹி வஸல்லம் அவர்களின் இந்த அறிவிப்பு, கவலையால் உறைந்து போயிருந்த அந்த நண்பர்களுக்கு இதயமளித்தது. எண்ணற்ற நபிமார்களின் சமூகத்தவர்கள் அனைவரும் மூன்று பகுதியைத்தான் பிடிக்க முடிந்தது. நமது ஒரு சமுதாயம் மட்டும் நான்கில் ஒரு பகுதியைப் பிடிக்க முடியும் என்ற செய்தி காதில் தேன் வார்க்கும் செய்தியல்லவா! எனவே அவர்கள் மகிழ்ச்சிப் பெருக்கில் தக்பீர் முழங்க ஆரம்பித்தார்கள். அந்த மலைப்பகுதியே எதிரொலித்தது.

நண்பர்களின் கரகோசத்தைக் கண்ணுற்ற நபிகள் நாயகம் ஸல்லல்லாஹு அலைஹி வஸல்லம் அவர்கள் ‘நண்பர்களே! சற்று இருங்கள்! சுவனத்தில் நான்கில் ஒரு பகுதியல்ல, மூன்றில் ஒரு பகுதி இடத்தை நாம் பிடிப்போம் என நான் நம்புகிறேன்’ என்றார்கள். நண்பர்களின் மகிழ்ச்சி மேலும் அதிகமானது. அதைக் கண்ட அண்ணலார் ஸல்லல்லாஹு அலைஹி வஸல்லம் ‘இல்லை நண்பர்களே! சுவனத்தில் சரி பாதி இடத்தை நாம் பெறுவோம்! என்றார்கள். தக்பீர் ஒலி அதிகமாகவே அண்ணலார் ஸல்லல்லாஹு அலைஹி வஸல்லம் மேலும் கூறினார்கள், ‘இல்லை! மூன்றில் இரு பகுதி இடத்தை நாம் பெறுவோம்! சுவனத்திற்கு பன்னிரெண்டு வரிசைகள் செல்கிறார்கள் என்றால் நம் மக்கள் எட்டு வரிசையினராக இருப்பர். அது மட்டுமல்ல, நமது சமுதாயத்தில் எழுபதாயிரம் பேர் கேள்வி கணக்கின்றி சுவனம் செல்வார்கள்.’

அண்ணலார் ஸல்லல்லாஹு அலைஹி வஸல்லம் அவர்களின் நற்செய்தியைச் செவியுற்ற ஹளரத் உமர் ரளியல்லாஹு அன்ஹு அவர்கள் ‘எழுபதாயிரம் நபர்களா?’ என ஆச்சரிமடைந்தார்கள். ‘இல்லை உமரே! அந்த எழுபதாயிரம் பேர்களில் ஒவ்வொருவருடனும் எழுபதாயிரம் பேர் கேள்வி கணக்கின்றி சுவனம் செல்வார்கள்’ என்று அண்ணலார் ஸல்லல்லாஹு அலைஹி வஸல்லம் அறிவித்தார்கள். அப்போது ஹளரத் உகாஷத் பின் மிஹ்ஸன் ரளியல்லாஹு அன்ஹு அவர்கள் எழுந்து ‘யா ரஸூலல்லாஹ்! அவ்வாறு கேள்வி கணக்கின்றி சுவனம் செல்வோரில் என்னையும் ஒருவராக அறிவியுங்களேன்!’ என்றார். ‘அன்த மின்ஹும்! (உங்கள் ஆசைப்படியே நீரும்; அதில் ஒருவராவீர்!’ என்று அண்ணல் நபி ஸல்லல்லாஹு அலைஹி வஸல்லம் அறிவித்தார்கள். அதைச் செவியுற்ற அன்சாரித் தோழர்களில் ஒருவர் எழுந்து தன்னையும் அவ்வாறு அறிவிக்குமாறு கேட்டுக் கொண்டார். ‘உகாஷா உம்மை விட முந்திவிட்டார்’ என்று கூறிய நபிகளார் ஸல்லல்லாஹு அலைஹி வஸல்லம் அவருக்கு அவ்வாறு சொல்ல மறுத்துவிட்டார்கள்.

இந்த நபிமொழி அஹ்மது, திர்மிதீ ஆகிய நூல்களில் ஹளரத் இம்ரான் பின் ஹஸீன் ரளியல்லாஹு அன்ஹு வாயிலாக அறிவிக்கப்படுகிறது.

சுவனத்திற்குச் செல்வோரில் நான்கில் ஒரு பகுதியாக அறிவிக்கப்பட்ட நமது சமுதாயம் மூன்றில் இரு பங்காக உயர்வு பெற்றது அண்ணலார் ஸல்லல்லாஹு அலைஹி வஸல்லம் அவர்களின் ஷஃபாஅத்தினால் அல்லவா!

ஆறு சந்தர்ப்பங்களில் அண்ணலார் ஸல்லல்லாஹு அலைஹி வஸல்லம் அவர்களின் ஷஃபாஅத்

1. உயிர்தெழுப்பப்பட்ட மக்கள் மஹ்ஷர் மைதானத்தில் தீர்ப்பு வழங்கப் பெறாமல் தாமதப்படுத்தப்படுவார்கள். மறுமையின் சிரமத்தில் சிக்கித்தவிக்கும் மக்கள் ‘அரிஹ்னா வ லவ் இலன் நார் (நரகம் என்றாவது தீர்ப்பளித்து எங்களுக்கு நிம்மதியைத் தாருங்களேன்!’ என்று கதறுவார்கள். அந்த நேரத்தில் ‘சரி! நீங்கள் நரகம் செல்லுங்கள்!’ என்று சொல்லப்படும் தீர்ப்பு அவர்களுக்கு நற்செய்தியாக அமையுமாம். அந்த சூழ்நிலையை திருக்குர்ஆன் அரை வரியில் அழகாக படம்பிடித்து காட்டுகிறது.

''நிச்சயமாக எவர் அல்லாஹ்வின் வசனங்களை நிராகரித்துக் கொண்டும் நீதமின்றி நபிமார்களைக் கொலை செய்து கொண்டும், மனிதர்களிடத்தில் நீதமாக நடக்கவேண்டும் என்று ஏவுவோரையும் கொலை செய்து கொண்டும் இருக்கின்றார்களோ அவர்களுக்கு நோவினை மிக்க வேதனை உண்டு"" என்று (நபியே!) நீர் நன்மாராயங் கூறுவீராக! (அல்குர்ஆன் 3: 21)

அது போன்ற சூழ்நிலையில் நபிகள் நாயகம் ஸல்லல்லாஹு அலைஹி வஸல்லம் அவர்கள் அனைத்து மக்களுக்கும் விரைவில் தீர்ப்பு வழங்கப்படுவதற்காக அல்லாஹ்விடம் சிபாரிசு செய்வார்கள். அண்ணலார் ஸல்லல்லாஹு அலைஹி வஸல்லம் அவர்களின் சிபாரிசு ஏற்றுக் கொள்ளப்பட்டு உடனடியாக தீர்ப்பு வழங்கத் துவங்கப்படும்.

2. சுவனத்திற்கு செல்லவிருக்கும் சிலருக்கு, அவர்கள் கேள்வி கணக்கு உட்படுத்தப்படக் கூடாது என்று அண்ணலார் ஸல்லல்லாஹு அலைஹி வஸல்லம் சிபாரிசு செய்வார்கள். ஏற்றுக் கொள்ளப்படும்.

3. நரகம் கடமையாகிவிட்ட சிலருக்கு, அவர்கள் நரகத்திற்கு அனுப்பப்படக்கூடாது என்று அண்ணலார் ஸல்லல்லாஹு அலைஹி வஸல்லம் சிபாரிசு செய்வார்கள். ஏற்றுக் கொள்ளப்படும்.

4. நரகத்திற்கு அனுப்பப்பட்டு விட்ட தனது சமூகத்தைச் சார்ந்த அத்தனை பேரும் அதிலிருந்து வெளியாக்கப்பட்டு சுவனத்துக்கு அனுப்பப்பட வேண்டும் என்று அண்ணலார் ஸல்லல்லாஹு அலைஹி வஸல்லம் சிபாரிசு செய்வார்கள். அதுவும் ஏற்றுக் கொள்ளப்படும்.

5. சுவனத்திற்குச் சென்றுவிட்ட சிலருக்கு, அவர்களுக்கு இன்னும் தரமிக்க சுவனம் தரப்பட வேண்டுமென அண்ணலார் ஸல்லல்லாஹு அலைஹி வஸல்லம் சிபாரிசு செய்வார்கள். அதுவும் ஏற்றுக் கொள்ளப்படும்.

6. நரகம் சென்று விட்ட ஈமான் கொள்ளாத சிலர் குறித்து, அவர்களின் வேதனை இலேசாக்கப்பட வேண்டுமென அண்ணலார் ஸல்லல்லாஹு அலைஹி வஸல்லம் சிபாரிசு செய்வார்கள். அதுவும் ஏற்றுக் கொள்ளப்படும்.

நபிகள் நாயகம் ஸல்லல்லாஹு அலைஹி வஸல்லம் அவர்களிடம் ஹளரத் இப்னு அப்பாஸ் ரளியல்லாஹு அன்ஹு, வினவினார்கள், ‘யா ரஸூலல்லாஹ்! தங்கள் சிரிய தந்தைக்காக தாங்கள் என்ன செய்வீர்கள்? அவர் உங்களுக்காக தனது சமூகத்தைப் பகைத்துக் கொண்டார். உங்களை அவர்களிடமிருந்து பாதுகாத்து வந்தாரரே!’

அதைச்செவியுற்ற அண்ணலார் ஸல்லல்லாஹு அலைஹி வஸல்லம் கூறினார்கள், ‘அவர் நரகத்தின் மேல்தளத்தில் விசாலமான பகுதியில் இடம்பெறுவார். நான் சிபாரிசு செய்யவில்லையாயின் நரகத்தின் கீழ்ப்பகுதியின் நெருக்கடியான இடத்தில் இடம் பெறுவார்.’ (அறிவிப்பாளர்: ஹளரத் இப்னு அப்பாஸ் ரளியல்லாஹு அன்ஹு, நூல்: புகாரி)

சிபாரிசு செய்ய உரிமை பெறும் மற்றவர்கள்

குர்ஆன்: குர்ஆனை ஓதி வருபவர்களுக்காக திருக்குர்ஆன் சிபாரிசு செய்யும்.

நபிகள் நாயகம் ஸல்லல்லாஹு அலைஹி வஸல்லம் நவின்றார்கள்: ‘குர்ஆனை ஓதி வாருங்கள். மறுமை நாளில் தன்னை ஓதியவர்களுக்காக அது சிபாரிசு செய்யும். சூரத்துல் பகரா, சூரத்துல் ஆல இம்ரான் ஆகிய இரு ஒளி பொருந்திய அத்தியாயங்களை ஓதி வாருங்கள். அவ்விரண்டும் சிபாரிசு செய்யும்.’ (அறிவிப்பாளர்: ஹளரத் அபூ உமாமா ரளியல்லாஹு அன்ஹு, நூல்: முஸ்லிம்)

நபிகள் நாயகம் ஸல்லல்லாஹு அலைஹி வஸல்லம் அவர்கள் அறிவித்தார்கள்: ‘மறுமை நாளில், நபிமார்கள், ஆலிம்கள், ஷஹீதுகள் ஆகிய மூன்று வகையினர் சிபாரிசு செய்யும் உரிமை பெறுவார்கள்.’  (அறிவிப்பாளர்: ஹளரத் உதுமான் இப்னு அஃப்பான் ரளியல்லாஹு அன்ஹு, நூல்: இப்னு மாஜா)

வல்ல ரஹ்மான் பெருமானார் ஸல்லல்லாஹு அலைஹி வஸல்லம் அவர்களின் ஷஃபாஅத்துக்கு அருகதை பெற்றவர்களாக நம்மை ஆக்குவானாக!

நன்றி: குர்ஆனின் குரல், ஜனவரி 2005