தராவீஹ் பயான் பிறை – 26
தலைப்பு : “. ஈமானும் வியாபாரமும் ”
ஹிஜ்ரி 1447.
بسم الله الرحمن الرحيم
الحمد لله رب العالمين عدد خلقه ورضا نفسه وزنة عرشه ومداد كلماته الصلاة والسلام على رسول الله صلى الله عليه وسلم وعلى آله وأصحابه وأهل بيته أجمعين أما بعد
وَيْلٌ لِّلْمُطَفِّفِيْنَۙ
அளவு (எடையில்) மோசம் செய்பவர்களுக்கு கேடுதான்.(அல்குர்ஆன் : 83:1)
الَّذِيْنَ اِذَا اكْتَالُوْا عَلَى النَّاسِ يَسْتَوْفُوْنَ
அவர்கள் மனிதர்களிடமிருந்து அளந்து வாங்கும் போது நிறைவாக அளந்து வாங்குகின்றனர்.(அல்குர்ஆன் : 83:2)
وَاِذَا كَالُوْهُمْ اَوْ وَّزَنُوْهُمْ يُخْسِرُوْنَ
ஆனால், அவர்கள் அளந்தோ, நிறுத்தோ கொடுக்கும்போது குறை(த்து நஷ்டமுண்டா)க்குகிறார்கள்.(அல்குர்ஆன் : 83:3)
இன்று தராவீஹ் தொழுகையில் ஓதப்பட்ட ஸூரத்துல் முதஃப்பிபீன் அத்தியாயத்தில் மேற்சொன்ன முக்கியமான வசனங்களில் அல்லாஹ் வியாபாரிகள் குறித்து பேசுகிறான்.
நேர்மையான வியாபாரி பற்றி நபி ஸல்லல்லாஹு அலைஹி வஸல்லம் அவர்கள் கூறினார்கள்
اَلتَّاجِرُ الصَّدُوقُ الأَمِينُ مَعَ النَّبِيِّينَ وَالصِّدِّيقِينَ وَالشُّهَدَاءِ
உண்மை பேசக்கூடிய, அமானிதத்தைப் பேணக்கூடிய வியாபாரி (மறுமையில்) நபிமார்கள், உண்மையாளர்கள் மற்றும் தியாகிகளுடன் இருப்பார்.
மோசடி செய்பவர்களுக்கு எதிராக நபி (ஸல்) அவர்கள் விடுத்த கடும் எச்சரிக்கை.
مَنْ غَشَّ فَلَيْسَ مِنِّي
யார் (வியாபாரத்தில்) மோசடி செய்கிறாரோ, அவர் என்னைச் சார்ந்தவர் அல்ல.
நபி (ஸல்) அவர்கள் எடை போடுபவருக்கு இட்ட கட்டளை.
زِنْ وَأَرْجِح
(சரியாக) எடை போடுவீராக, (வாடிக்கையாளருக்குச் சாதகமாகச் சற்றே) சாய்வாக (அதிகமாக) நிறுத்துவீராக.
வியாபாரத்தில் உண்மை பேசினால் கிடைக்கும் பலன்.
فَإِنْ صَدَقَا وَبَيَّنَا بُورِكَ لَهُمَا فِي بَيْعِهِمَا
விற்பவரும் வாங்குபவரும் உண்மையைப் பேசி, குறைகளைத் தெளிவுபடுத்தினால், அவர்களது வியாபாரத்தில் 'பரக்கத்' (அருள்வளம்) அளிக்கப்படும்.
இந்த மூன்று வசனங்களும் இஸ்லாமியப் பொருளாதார நீதியின் (Economic Justice) அடிப்படைத் தூண்களாக விளங்குகின்றன. ஒரு முஸ்லிம் தனது ஆன்மீக வாழ்வில் எவ்வளவு கவனமாக இருக்கிறாரோ, அதே அளவு தனது கொடுக்கல் வாங்கல்களிலும் (Business Ethics) நேர்மையாக இருக்க வேண்டும் என்பதை இவை வலியுறுத்துகின்றன.
'தஃபீஃப்' (Tafif) என்றால் அரபு மொழியில் மிகச்சிறிய அல்லது அற்பமான விஷயம் என்று பொருள். அதாவது, எடையில் மிகச் சிறிய அளவைக் குறைப்பவர்களைக் கூட இந்த வசனம் எச்சரிக்கிறது. "யாரும் கவனிக்க மாட்டார்கள்", "ஒரு சில கிராம் குறைந்தால் என்ன ஆகப்போகிறது?" என்று அற்பமாக நினைத்துச் செய்யப்படும் மோசடி கூடப் பெரும் பாவமாகும்.
இந்த வசனங்கள் ஒரு மோசமான மனிதப் பண்பைச் சுட்டிக்காட்டுகின்றன:
வாங்கும் போது: தமக்கு வரவேண்டிய லாபம் அல்லது பொருள் ஒரு மில்லிமீட்டர் கூடக் குறையாமல் மிகச் சரியாக, முழுமையாக இருக்க வேண்டும் என்று எதிர்பார்க்கிறார்கள்.
கொடுக்கும் போது: அடுத்தவருக்குக் கொடுக்கும்போது தந்திரமாகச் சில மில்லிமீட்டர்களைக் குறைத்து விடுகிறார்கள்.
இது வெறும் வியாபார மோசடி மட்டுமல்ல, ஒரு மனிதனின் மனசாட்சி செத்துவிட்டதற்கான அடையாளம். பிறருக்கு ஒரு நீதியையும், தமக்கு ஒரு நீதியையும் வைத்திருப்பதே அநீதி (Injustice).
எடை மற்றும் அளவை என்பது ஒரு சமூகத்தின் நம்பிக்கையின் (Trust) அடையாளம். எப்போது ஒரு சமூகத்தில் அளவை மோசடி அதிகரிக்கிறதோ, அங்கு பரக்கத் (இறை அருட்கொடை) நீங்கிவிடும்.
நபிகள் நாயகம் ஸல்லல்லாஹு அலைஹி வஸல்லம் அவர்கள் கூறினார்கள்: "எந்தச் சமூகம் அளவையிலும் எடையிலும் மோசடி செய்கிறதோ, அச்சமூகம் பஞ்சத்தாலும், கடுமையான உழைப்பாலும், ஆட்சியாளர்களின் அநீதியாலும் தண்டிக்கப்படாமல் இருப்பதில்லை." (இப்னு மாஜா).
பரக்கத் (Blessing): நேர்மையாக வியாபாரம் செய்வதால் கிடைக்கும் குறைந்த லாபத்தில் அல்லாஹ்வின் அருள் இருக்கும். மோசடி செய்து சம்பாதிக்கும் கோடிக்கணக்கான ரூபாயில் நிம்மதி இருக்காது.
மறுமை விசாரணை: அடுத்த 4, 5 மற்றும் 6-வது வசனங்களில் அல்லாஹ் கேட்கிறான்: "மகத்தான அந்த நாளில் தாங்கள் எழுப்பப்படுவோம் என்பதை இவர்கள் கருத்தில் கொள்ளவில்லையா?" என்று. இந்த ஒரு கேள்விதான் மோசடியில் ஈடுபடுபவர்களைத் தடுக்கும் மிகச்சிறந்த மருந்தாகும்.
ஃபுளைல் இப்னு இயாள் (ரஹ்) அவர்களின் வாழ்வில் நடந்த நிகழ்வு,
ஃபுளைல் இப்னு இயாள் ரஹ்மத்துல்லாஹி அலைஹி அவர்களின் மகன் அலி, ஒருமுறை தன்னிடம் இருந்த ஒரு தீனார் (தங்க நாணயம்) அல்லது திர்ஹமை (வெள்ளி நாணயம்) மற்றவருக்கு மாற்றிக் கொடுக்கும்போது, அந்த நாணயத்தில் ஒட்டியிருந்த சிறிதளவு அழுக்கை அல்லது கறையை மிகக் கவனமாகச் சுரண்டி எடுத்துச் சுத்தம் செய்துவிட்டுத் தூய்மையான நாணயமாகக் கொடுத்தார்கள்.
இதைப் பார்த்த தந்தை ஃபுளைல் இப்னு இயாள் (ரஹ்மத்துல்லாஹி அலைஹி) அவர்கள் அழுதுவிட்டார்கள். பிறகு தன் மகனை நோக்கி:
"மகனே! நீ செய்த இந்தச் செயல் (நாணயத்தின் அழுக்கை நீக்கியது), உனக்கு இரண்டு ஹஜ் மற்றும் இரண்டு உம்ரா செய்த நன்மையை விட மேலானது" என்று கூறினார்கள்.
வியாபாரத்தில் நேர்மையாக இருப்பது ஹஜ் மற்றும் உம்ரா செய்த நன்மையை தரும் என்ற பொருளில் அவர்கள் கூறினார்கள்.
ஸுவைத் இப்னு கைஸ் (ரலி) அவர்கள்.
ஸுவைத் இப்னு கைஸ் ரலியல்லாஹு அன்ஹு அவர்கள் கூறுகிறார்கள்:
"நானும் மக்ரமா அல்-அப்தீ என்பவரும் (ஹிஜ்ரத்திற்கு முன்) மக்காவிலிருந்து துணிகளை இறக்குமதி செய்து விற்றுக்கொண்டிருந்தோம். அப்போது நபி ஸல்லல்லாஹு அலைஹி வஸல்லம் அவர்கள் எங்களிடம் வந்து, எங்களிடமிருந்த கால்சட்டை (சிராவீல்) ஒன்றை விலைபேசி வாங்கினார்கள்."
அப்போது அங்கே ஒரு மனிதர் கூலிக்கு எடை போட்டுக்கொடுப்பவராக இருந்தார். அவரிடம் நபி (ஸல்) அவர்கள் ஒரு முக்கியமான கட்டளையைப் பிறப்பித்தார்கள்:
زن وأرجح
"எடை போடுவீராக! (அதில் வாடிக்கையாளருக்குச் சாதகமாகச் சற்றே) சாய்வாக (அதிகமாக) நிறுத்துக் கொடுப்பீராக!"(நூல்:அபூ தாவூத்,).
இமாம் அபூ ஹனீஃபா (ரஹ்) - "குறைபாடுள்ள ஆடை"
பெரும் இமாமாக அறியப்படும் அபூ ஹனீஃபா ரஹ்மத்துல்லாஹி அலைஹி அவர்கள் ஒரு சிறந்த துணி வியாபாரியும் கூட. ஒருமுறை தனது கடைப் பணியாளரிடம் ஒரு ஆடையைக் கொடுத்து, "இதில் ஒரு சிறு குறைபாடு உள்ளது, இதை விற்கும்போது வாடிக்கையாளரிடம் அதைச் சொல்லிவிடு" என்றார்கள். ஆனால் பணியாளர் அதைச் சொல்ல மறந்து விற்றுவிட்டார்.
இதையறிந்த இமாம் அவர்கள், அந்த முழு வியாபாரத்தின் மூலம் கிடைத்த லாபத்தையும் (சுமார் 30,000 திர்ஹம்கள்) ஏழைகளுக்குத் தர்மம் செய்துவிட்டார்கள். ஏனெனில், மோசடியான பணம் தன் செல்வத்தோடு கலந்துவிடக்கூடாது என்று அஞ்சினார்கள்.
யூனுஸ் இப்னு உபைத் (ரஹ்) மற்றும் 200 திர்ஹம் லாபம்
யூனுஸ் இப்னு உபைத் ரஹ்மத்துல்லாஹி அலைஹி அவர்கள் தனது கடையில் பல்வேறு விலைகளில் பட்டுத் துணிகளை வைத்திருந்தார். ஒரு ரக ஆடையின் விலை 200 திர்ஹம்கள், மற்றொரு உயர்தர ஆடையின் விலை 400 திர்ஹம்கள்.
ஒருமுறை அவர் தொழுகைக்காகப் பள்ளிவாசலுக்குச் சென்றிருந்தபோது, அவருடைய சகோதரர் மகன் கடையைப் பார்த்துக் கொண்டிருந்தார். அப்போது ஒரு கிராமவாசி கடைக்கு வந்தார். அவர் 400 திர்ஹம் மதிப்புள்ள ஆடையைக் கேட்டார்.
ஆனால், பணியிலிருந்த அந்த வாலிபர் தவறுதலாக 200 திர்ஹம் மதிப்புள்ள ஆடையைக் காட்டி, அதன் விலை 400 திர்ஹம் என்று கூறி விற்றுவிட்டார். அந்த கிராமவாசியும் மகிழ்ச்சியுடன் அதை வாங்கிச் சென்றார்.
திரும்பி வந்த யூனுஸ் இப்னு உபைத் அவர்கள், 200 திர்ஹம் துணி விற்கப்பட்டிருப்பதையும், அதற்கு 400 திர்ஹம் வாங்கப்பட்டிருப்பதையும் அறிந்து திடுக்கிட்டார். உடனே அந்த கிராமவாசியைத் தேடி ஓடினார்.
சுமார் ஒரு மைல் தூரம் ஓடிச் சென்று அந்த மனிதரைப் பிடித்தார். அவரிடம், "சகோதரரே! நீங்கள் வாங்கிய ஆடையின் விலை 200 திர்ஹம் தான், ஆனால் என் மருமகன் உங்களிடம் 400 திர்ஹம் வாங்கிவிட்டார். இது தவறு" என்றார்.
அதற்கு அந்த கிராமவாசி, "பரவாயில்லை, எங்கள் ஊரில் இந்தத் துணியின் விலை 500 திர்ஹம் வரை விற்கிறது. நான் திருப்தியாகத்தான் வாங்கினேன்" என்றார்.
ஆனால் யூனுஸ் இப்னு உபைத் அவர்கள் விடவில்லை. அவர்கள் சொன்னார்கள்:
"நீங்கள் திருப்தியாக இருக்கலாம், ஆனால் ஒரு முஸ்லிமாக உமக்கு எது நன்மையோ, அதையே எனக்கும் நன்மையாகக் கருதுவதற்கு என் ஈமான் (நம்பிக்கை) கடமைப்பட்டுள்ளது. எனவே, நீங்கள் மீதி 200 திர்ஹமைத் திரும்பப் பெற்றுக் கொள்ளுங்கள் அல்லது இந்த ஆடையைத் தந்துவிட்டு 400 திர்ஹமையும் வாங்கிச் செல்லுங்கள்."
இறுதியில் அந்த மனிதரிடம் 200 திர்ஹமைத் திருப்பி ஒப்படைத்த பின்னரே அவர் நிம்மதி அடைந்தார்கள்.
முஸ்லிமின் நலம் நாடுதல்: "தான் விரும்புவதையே தன் சகோதரனுக்கும் விரும்பாதவரை ஒருவர் முழுமையான முஃமின் ஆக முடியாது"
வாடிக்கையாளர் அதிக விலை கொடுக்கத் தயாராக இருந்தாலும், பொருளின் உண்மையான மதிப்பை விட அதிகமாக வாங்குவது 'தார்மீக மோசடி' என்று அவர் கருதினார்கள்.
200 திர்ஹம் லாபத்தை விட, மறுமையில் அல்லாஹ்வின் கேள்விக்கு பதில் சொல்ல வேண்டுமே என்ற பயமே அவரை ஒரு மைல் தூரம் ஓட வைத்தது.
மத்யன் சமூகத்தின் பின்னணி
மத்யன் என்பது ஒரு நிலப்பரப்பின் பெயர். இவர்கள் இப்ராஹீம் அலைஹிஸ்ஸலாம் அவர்களின் மகன்களில் ஒருவரான 'மத்யன்' என்பவரின் வழித்தோன்றல்கள். இவர்கள் செழிப்பான சோலைகளையும், வணிகப் பாதைகளையும் கொண்ட பகுதியில் வாழ்ந்தனர். ஆனால், காலப்போக்கில் இவர்கள் அல்லாஹ்வை வணங்குவதை விட்டுவிட்டு சிலைகளை வணங்கத் தொடங்கினார்கள். அத்துடன் சமூகச் சீரழிவுகளில் மிக மோசமான "பொருளாதார பயங்கரவாதத்தில்" ஈடுபட்டனர்.
அவர்கள் செய்த முக்கிய நான்கு குற்றங்கள்:
இறை நிராகரிப்பு (குஃப்ர்): அல்லாஹ்வுக்கு இணைகற்பித்தல்.
அளவை மோசடி: பொருட்களை விற்கும்போது எடையில் குறைப்பது.
வழிப்பறி: வர்த்தகப் பாதைகளில் அமர்ந்து கொண்டு வழிப்போக்கர்களை மிரட்டிப் பணம் பறிப்பது.
மார்க்கத்தைத் தடுத்தல்: இறைநம்பிக்கையாளர்களை மிரட்டுவது மற்றும் அல்லாஹ்வின் பாதையிலிருந்து மக்களைத் தடுப்பது.
அல்லாஹ் ஷுஐப் (அலைஹிஸ்ஸலாம்) அவர்களை அச்சமூகத்திற்குத் தூதராக அனுப்பினான். அவர்கள் தம் சமூகத்தை நோக்கிச் சொன்ன அறிவுரைகளை குர்ஆன் இவ்வாறு பதிவு செய்கிறது:
"என்னுடைய சமூகத்தவர்களே! அல்லாஹ்வையே வணங்குங்கள். அளவையும் எடையையும் பூரணமாக நிறைவேற்றுங்கள். மனிதர்களுக்கு அவர்களுக்குரிய பொருட்களை (கொடுப்பதில்) குறைத்து விடாதீர்கள். பூமி சீர்திருத்தப்பட்ட பின்னர் அதில் குழப்பம் விளைவிக்காதீர்கள்." (அல்குர்ஆன் 7:85)
அவர்கள் மேலும் கூறினான்: "நீங்கள் வியாபாரத்தில் லாபம் சம்பாதிப்பதை விட, அல்லாஹ் அனுமதித்த (நேர்மையான) மிச்சமே உங்களுக்கு மிகச் சிறந்தது." (அல்குர்ஆன் 11:86).
ஷுஐப் (அலைஹிஸ்ஸலாம்) அவர்களின் அறிவுரையைக் கேட்ட அந்த மக்கள் மிகத் திமிராகப் பதிலளித்தனர். அவர்கள் சொன்னார்கள்:
"ஷுஐபே! நாங்கள் எங்கள் முன்னோர்கள் வணங்கிய தெய்வங்களைக் கைவிட வேண்டும் என்றும், எங்கள் சொத்துக்களை நாங்கள் விரும்பியபடி செலவு செய்வதைத் தவிர்க்க வேண்டும் என்றும் உமது தொழுகையா உமக்குக் கட்டளையிடுகிறது?" (அல்குர்ஆன் 11:87).
அதாவது, "பொருளாதாரம் என்பது எங்கள் இஷ்டம், அதில் தலையிட மார்க்கத்திற்கு உரிமை இல்லை" என்ற மதச்சார்பற்ற (Secular) வாதத்தை அவர்கள் முன்வைத்தனர். மேலும், ஷுஐப் (அலைஹிஸ்ஸலாம்) அவர்களைப் பார்த்து "நீர் ஒரு சூனியக்காரர்" என்றும், "நாங்கள் உம்மை கல்லால் எறிந்து கொல்வோம்" என்றும் மிரட்டினர்.
தொடர்ந்து எச்சரித்தும் அவர்கள் திருந்தாதபோது, அல்லாஹ்வின் தண்டனை மூன்று நிலைகளில் வந்தது:
கடுமையான வெப்பம்: ஏழு நாட்களுக்குச் சூரியன் கடும் நெருப்பை உமிழ்ந்தது. கிணற்று நீர் கொதித்தது, நிழல் எங்கும் கிடைக்கவில்லை.
மேகக் கூட்டம் (அதாபுத் ழுல்லா): தாகத்தால் தவித்த மக்கள், ஓரிடத்தில் திரண்டிருந்த கருமேகத்தைக் கண்டு நிழல் கிடைக்கும் என ஓடினர். ஆனால் அந்த மேகத்திலிருந்து நெருப்பு மழை பொழிந்தது.
பயங்கரச் சத்தம் மற்றும் நிலநடுக்கம்: இறுதியாக, ஜிப்ரயீல் (அலைஹிஸ்ஸலாம்) அவர்கள் எழுப்பிய ஒரு பயங்கரச் சத்தமும், நிலநடுக்கமும் அவர்களை நிலைகுலையச் செய்தது. அவர்கள் அனைவரும் தங்கள் வீடுகளிலேயே முகங்குப்புற விழுந்து அழிந்தனர்.
"மத்யன் வாசிகள் தொழுகையை விடவில்லை அல்லது நோன்பை மறுக்கவில்லை. அவர்கள் 'பொருளாதாரத்தில் எங்கள் இஷ்டப்படி நடப்போம்' என்று சொன்னார்கள். இன்று நம்மில் பலர் தொழுகையாளிகளாக இருந்தும், வியாபாரத்தில் பொய் பேசுவதையும், அளவையில் ஏமாற்றுவதையும் சாதாரண விஷயமாக நினைக்கிறோம். மத்யன் சமூகத்தின் அழிவு நமக்கு ஒரு மிகப்பெரிய எச்சரிக்கை!"
அப்துல்லாஹ் இப்னு உமர் (ரலி) - ஒட்டக வியாபாரம்
ஒருமுறை இப்னு உமர் ரலியல்லாஹு அன்ஹு அவர்கள் ஒட்டகங்களை விற்று லாபம் ஈட்டினார்கள். அப்போது கலீஃபாவாக இருந்த உமர் ரலியல்லாஹு அன்ஹு அவர்கள், "இந்த ஒட்டகங்கள் எப்படி இவ்வளவு கொழுத்திருக்கிறது?" என்று கேட்டார்கள். அதற்கு மக்கள், "இவை இப்னு உமருடையவை என்பதால் மேய்ச்சல் நிலத்தில் இதற்கு அதிக முன்னுரிமை கிடைத்தது" என்றனர்.
உடனே உமர் ரலியல்லாஹு அன்ஹு அவர்கள், "அப்படியானால் இந்த அதிகப்படியான லாபம் உனக்குச் சேரக்கூடாது, அது பொது நிதிக்குச் சேர வேண்டும்" என்று கூறி அசலான லாபத்தை மட்டும் கொடுத்துவிட்டு மீதத்தைப் பறிமுதல் செய்தார்கள்.
அதிகாரத்தைப் பயன்படுத்தி வியாபாரத்தில் கூடுதல் லாபம் பெறுவதும் ஒருவகை அநீதி என்பதை இது காட்டுகிறது.
தராசைத் துடைப்பதன் காரணம்
அந்தக் காலத்தில் தராசுகள் பொதுவாகத் தட்டுகள் மற்றும் கயிறுகளால் ஆனவை. தராசின் தட்டுகளில் தூசி, ஈரப்பதம் அல்லது முந்தைய வியாபாரத்தின்போது ஒட்டிய சிறு பொருட்கள் (உதாரணமாக மாவு, எண்ணெய் அல்லது மணல்) இருக்கலாம்.
ஒரு வியாபாரி ஒரு பொருளை எடை போடும்போது, அந்தத் தட்டில் ஒட்டியிருக்கும் ஒரு சிறிய தூசியின் எடை கூட வாடிக்கையாளர் வாங்கும் பொருளின் எடையைக் கூட்டிவிடலாம் (அதாவது வாடிக்கையாளர் குறைவான பொருளைப் பெறுவார்).
ஒரு தூசு அளவு கூட அடுத்தவர் சொத்து நம்மிடம் வந்துவிடக்கூடாது என்பதற்காக, ஒவ்வொரு முறை எடை போடுவதற்கு முன்பும் தராசைத் துடைப்பது அவர்களின் வழக்கமாக இருந்தது.
அப்துல்லாஹ் இப்னு அப்பாஸ் (ரலி) அவர்களின் எச்சரிக்கை
இதே போன்ற ஒரு சூழலில் இப்னு அப்பாஸ் ரலியல்லாஹு அன்ஹு அவர்கள் எடை போடுபவர்களைப் பார்த்து இப்படிக் கூறுவார்கள்:
"எடை போடுபவர்களே! உங்களுக்கு முன்னால் வாழ்ந்த சமுதாயங்கள் (மத்யன் போன்றவை) எதனால் அழிந்தனவோ, அந்த ஒரு பொறுப்பு உங்கள் கைகளில் ஒப்படைக்கப்பட்டுள்ளது. எனவே இதில் மிக எச்சரிக்கையாக இருங்கள்."
ஒரு தூசு என்பது யாருடைய கண்ணுக்கும் தெரியாது, யாரும் அதற்காக புகார் செய்ய மாட்டார்கள். ஆனால், இறைவனின் தராசு மிகத் துல்லியமானது. அங்கே ஒரு தூசுக்கும் கணக்கு உண்டு.
வியாபாரம் என்பது ஒரு ஒப்பந்தம் மட்டுமல்ல, அது ஒரு அமானிதம். தராசைத் துடைப்பது என்பது அந்த அமானிதத்தைப் பாதுகாக்கும் ஒரு செயலாகும்.
இன்று மின்னணு தராசுகள் (Electronic Scales) வந்த பிறகு, பலர் தராசின் எடையை மறைப்பதற்கும், சென்சார்களை மாற்றுவதற்கும் முயற்சிக்கிறார்கள். ஆனால் சஹாபாக்கள், ஒரு தூசு கூடத் தவறுதலாகச் சேர்ந்துவிடக்கூடாது என்பதில் கவனமாக இருந்தனர்.
முன் வாழ்ந்த ஒரு சமுதாயத்தில்
பனூ இஸ்ரேல் ஒரு மனிதர் மற்றொருவரிடமிருந்து ஒரு நிலத்தை வாங்கினார். அந்த நிலத்தை வாங்கியவர், அதில் ஒரு குழியைத் தோண்டியபோது, அங்கே தங்கம் நிரப்பப்பட்ட ஒரு ஜாடி (புதையல்) இருப்பதைக் கண்டார்.
பொதுவாக இன்று இது போன்ற சூழல் ஏற்பட்டால், நிலத்தை வாங்கியவர் அதை ரகசியமாக வைத்துக் கொள்வார். ஆனால் அந்த இரு மனிதர்களும் உண்மையான முஃமின்களாக இருந்தனர்.
நிலத்தை விற்றவரிடம் சென்று, நான் உங்களிடம் நிலத்தைத்தான் வாங்கினேன், இந்தத் தங்கத்தை அல்ல. எனவே உமது நிலத்தில் இருந்த இந்தப் புதையலை நீங்களே எடுத்துக் கொள்ளுங்கள்" என்றார்கள்.
நிலத்தை விற்றவர்: "அல்லாஹ்வின் மீது சத்தியமாக! நான் அந்த நிலத்தை அதிலுள்ள அனைத்தோடும்தான் உமக்கு விற்றேன். எனவே நிலத்தில் இருக்கும் இந்தப் புதையலும் உமக்குத்தான் சொந்தம்" என்று மறுத்துவிட்டார்.
இருவரும் அந்தத் தங்கத்தை எடுத்துக் கொள்ள முன்வராமல், ஒருவரிடம் ஒருவர் தள்ளிக்கொண்டே இருந்தனர். இறுதியில் தீர்ப்புக்காக ஒரு நீதிபதியிடம் (நடுவர்) சென்றனர்.
இந்த அதிசயமான வழக்கைக் கண்ட நீதிபதி ஆச்சரியமடைந்தார். பிறகு அவர்களிடம், "உங்கள் இருவருக்கும் பிள்ளைகள் உண்டா?" என்று கேட்டார்.
* ஒருவர் தன்னிடம் ஒரு மகன் இருப்பதாகக் கூறினார்.
* மற்றவர் தன்னிடம் ஒரு மகள் இருப்பதாகக் கூறினார்.
நீதிபதி தீர்ப்பளித்தார்: "உங்கள் மகனுக்கும், மற்றவரின் மகளுக்கும் திருமணம் செய்து வையுங்கள். அந்தத் தங்கத்தை அவர்களுக்குச் செலவு செய்யுங்கள், அதிலிருந்து தர்மமும் செய்யுங்கள்."
இவ்வாறு அந்தப் பிரச்சனை அழகிய முறையில் முடிவுக்கு வந்தது. (நூல்:புகாரி)
"வராஃ" - சந்தேகமானதைத் தவிர்த்தல்:
இந்த இரு மனிதர்களும் அந்தத் தங்கம் தங்களுக்குச் சொந்தமானதல்ல என்பதில் உறுதியாக இருந்தனர். அடுத்தவர் சொத்து ஒரு ஊசி அளவு கூடத் தன் வீட்டிற்குள் வந்துவிடக்கூடாது என்ற அச்சமே இவர்களை இப்படிப் பேச வைத்தது.
பரகத் (அருள்வளம்):
இன்று பலர் பிறர் சொத்தைப் பறிக்க நீதிமன்றம் செல்கிறார்கள். ஆனால் இவர்கள் பிறர் சொத்தைத் தவிர்க்க நீதிமன்றம் சென்றார்கள். இவர்களின் இந்த நேர்மையால்தான் அந்தத் தங்கம் அவர்களுக்கு ஒரு நற்பந்தத்தை (திருமணம்) ஏற்படுத்திக் கொடுத்தது.
"முதஃபிஃபீன்" என்பவர்கள் அற்பமான எடையில் ஏமாற்றுவார்கள். ஆனால் இந்தச் சம்பவத்தில் உள்ளவர்கள், தங்கமே கிடைத்தாலும் அது தனக்குரியதல்ல என்று ஒதுக்கித் தள்ளுகிறார்கள்.
"அளவையில் ஏமாற்றுபவர்கள் நரகத்திற்குச் செல்வார்கள் என்றால், இவர்களைப் போல நேர்மையாக நடப்பவர்களுக்குச் சொர்க்கத்தில் எவ்வளவு பெரிய அந்தஸ்து இருக்கும்!"
சிந்தித்துப் பாருங்கள்! நாம் பள்ளிவாசலில் காட்டும் அதே தக்வாவை (இறையச்சத்தை) நம் கடைவீதிகளிலும், அலுவலகங்களிலும், கொடுக்கல் வாங்கல்களிலும் காட்டுகிறோமா?
மறுமை நாளில் அல்லாஹ்வுக்கு முன்னால் நாம் அனைவரும் நின்றாக வேண்டும். மகத்தான அந்த நாளில், நாம் அநியாயமாக ஈட்டிய ஒரு அற்பமான நாணயமும், நாம் மறைத்த ஒரு சிறிய குறையும் நம்மை நரகத்தின் விளிம்பிற்கு இழுத்துச் சென்றுவிடலாம். 'முதஃபிஃபீன்' என்பவர்களுக்கு அல்லாஹ் எச்சரிக்கும் அந்த 'கேடு' (வயில்) நமக்கு வந்துவிடக் கூடாது!
எனவே, நாம் ஒரு உறுதியான முடிவை எடுப்போம்:
'எனது வருமானம் தூய்மையாக இருக்க வேண்டும், எனது கொடுக்கல் வாங்கல்களில் நான் நேர்மையாக இருப்பேன், அடுத்தவரின் அணுவளவு சொத்தையும் நான் அநியாயமாகப் பெறமாட்டேன்.'
வியாபாரம் என்பது வெறும் பணப் பரிமாற்றம் அல்ல; அதுவும் ஒரு இபாதத் (வணக்கம்) என்பதை நாம் உணர வேண்டும்.
"யா அல்லாஹ்! எங்களது வருமானத்தை ஹலாலானதாகவும், தூய்மையானதாகவும் ஆக்கி வைப்பாயாக!
அளவையிலும் எடையிலும் மோசடி செய்வதிலிருந்து எங்களைப் பாதுகாப்பாயாக! மறுமை நாளில் நேர்மையான வியாபாரிகளுடன் நபிமார்கள், உண்மையாளர்கள் மற்றும் தியாகிகளுடன் எழுப்பப்படும் பாக்கியத்தை எங்களுக்குத் தருவாயாக!"
ஆமீன், ஆமீன், யாரப்பல் ஆலமீன்.
தொகுத்தவர்.
மவ்லவி B.முஹம்மது ராஃபி ரஷீதி.
தலைமை இமாம். மஸ்ஜிதே முபாரக் கிருஷ்ணாம்பேட்டை அரக்கோணம்.
Cell : +91 90949 86824.
முந்தைய பதிவுகள் வாசிக்க 👇 கிளிக் செய்யவும்.
கருத்துகள் இல்லை:
கருத்துரையிடுக