பாவமன்னிப்புத் தேடுவோம்!
بسم الله الرحمن الرحيم
الحمد لله رب العالمين عدد خلقه ورضا نفسه وزنة عرشه ومداد كلماته الصلاة والسلام على رسول الله صلى الله عليه وسلم وعلى آله وأصحابه وأهل بيته أجمعين أما بعد
يٰۤاَيُّهَا الَّذِيْنَ اٰمَنُوْا تُوْبُوْۤا اِلَى اللّٰهِ تَوْبَةً نَّصُوْحًا
ஈமான் கொண்டவர்களே! கலப்பற்ற (மனதோடு) அல்லாஹ்விடம் தவ்பா செய்து, பாவமன்னிப்புப் பெறுங்கள்; உங்கள் இறைவன் உங்கள் பாவங்களை உங்களை விட்டுப் போக்கி உங்களைச் சுவனச் சோலைகளில் பிரவேசிக்கச் செய்வான்; அவற்றின் கீழே ஆறுகள் (சதா) ஓடிக் கொண்டே இருக்கும்; (அல்குர்ஆன் : 66:8)
يَا أَيُّهَا النَّاسُ تُوبُوا إِلَى اللَّهِ فَإِنِّي أَتُوبُ فِي الْيَوْمِ إِلَيْهِ مِائَةَ مَرَّةٍ
மக்களே! நீங்கள் அல்லாஹ்வின் பக்கம் மீளுங்கள் (தவ்பா செய்யுங்கள்). நிச்சயமாக நான் ஒரு நாளில் நூறு முறை அவனிடம் மன்னிப்புக் கோருகிறேன்.” நூல் :முஸ்லிம்
நாம் இப்போது பாவமன்னிப்புக்கு உகந்த ஒரு மகத்தான மாதத்தில் இருக்கிறோம்.
ரமலான் மாதம் இரண்டாம் ஜும்ஆவில் இருக்கின்றோம்.
இன்றுடன் ரமலான் முதல் ரஹ்மத் ஆன 10 தினங்கள் நிறைவு நாளை முதல் மக்ஃபிரத் பாவமன்னிப்புக்கு உண்டான இரண்டாவது 10 தினங்கள் ஆரம்பம் ஆக இருக்கிறது.
மனிதன் என்பவன் தவறுகளுக்கு ஆட்படக்கூடியவன். ஆனால், அந்தத் தவறிலேயே நிலைத்திருப்பது புத்திசாலித்தனம் அல்ல.
சிறந்த மனிதர் யாரெனில், தவறு செய்தவுடன் இறைவனிடம் வருந்தி மன்னிப்பு கேட்பவரே ஆவார்.
தவ்பா என்றால் என்ன?
'தவ்பா' என்ற அரபுச் சொல்லுக்கு "மீளுதல்" என்று பொருள். அதாவது, பாவமான பாதையிலிருந்து விலகி, மீண்டும் அல்லாஹ்வின் பக்கம் திரும்புவதே தவ்பா ஆகும்.
ஏன் இந்த மாதத்தில் மன்னிப்பு கேட்க வேண்டும்?
இந்த மாதம் இறைவனின் கருணை (ரஹ்மத்) பொழியும் காலம்.
* சுவனத்தின் கதவுகள் திறக்கப்படுகின்றன: நன்மைகள் செய்ய வாய்ப்புகள் அதிகம்.
* நரகத்தின் கதவுகள் மூடப்படுகின்றன: பாவங்களிலிருந்து விலகி இருக்க இது ஒரு கேடயம்.
* அதிகமானோர் விடுதலை: ஒவ்வொரு இரவிலும் ஏராளமான அடியார்களை அல்லாஹ் நரக நெருப்பிலிருந்து விடுதலை செய்கிறான். எனவே, அந்தப் பட்டியலில் நம் பெயரும் இடம்பெற நாம் அழுது மன்னிப்பு கேட்க வேண்டும்.
மன்னிப்பு கேட்கும் முறைகள் (தவ்பாவின் நிபந்தனைகள்)
உண்மையான பாவமன்னிப்பு உலமாக்கள் நான்கு நிபந்தனைகளைக் கூறுகிறார்கள்:
* வருந்துதல்: செய்த பாவத்தை நினைத்து உள்ளத்தால் வெட்கப்பட வேண்டும், வருந்த வேண்டும்.
* விலகுதல்: அந்தப் பாவத்தை அந்த நிமிடமே விட்டுவிட வேண்டும்.
* உறுதி எடுத்தல்: மீண்டும் ஒருபோதும் அந்தப் பாவத்தைச் செய்ய மாட்டேன் என்று அல்லாஹ்விடம் உறுதியளிக்க வேண்டும்.
* பிறர் உரிமை: நாம் செய்த பாவம் ஒரு மனிதருக்கு இழைக்கப்பட்ட அநீதியாக இருந்தால் (உதாரணமாக: திருட்டு, புறம் பேசுதல்), அவரிடம் மன்னிப்புப் பெற வேண்டும் அல்லது அவரது உரிமையை நிறைவேற்ற வேண்டும்.
அஸ்தஃபிருல்லாஹ் (Istighfar) தரும் நன்மைகள்
வெறும் பாவமன்னிப்பு மட்டுமன்றி, உலக ரீதியான நன்மைகளையும் இது தருகிறது:
* நிம்மதியான வாழ்வு: மன அழுத்தத்திலிருந்து விடுதலை கிடைக்கும்.
* பொருளாதார உயர்வு: அஸ்தஃபிருல்லாஹ் அதிகம் ஓதுபவருக்கு அல்லாஹ் எதிர்பாராத இடத்திலிருந்து வாழ்வாதாரத்தை (ரிஸ்க்) வழங்குகிறான்.
* மழை மற்றும் சந்ததி: வறட்சி நீங்கி மழையும், நன்மக்களும் கிடைக்க இது வழிவகுக்கும் (ஸூரா நூஹ் 10-12).
மன்னிப்பு கேட்பதற்கான நிபந்தனைகள்
வெறும் நாவினால் 'அஸ்தஃபிருல்லாஹ்' என்று சொல்வது மட்டும் தவ்பா அல்ல.
அதற்கு மூன்று முக்கிய நிபந்தனைகள் உள்ளன:
செய்த பாவத்திற்காக மனதார வருந்துவது.
அந்தப் பாவத்தை உடனடியாகக் கைவிடுவது.
மீண்டும் அந்தப் பாவத்தைச் செய்ய மாட்டேன் என்று உறுதியெடுப்பது
நபிகளாரின் முன்மாதிரி
நபிகள் நாயகம் (ஸல்) அவர்கள் பாவமற்றவர்கள். இருப்பினும், அவர்கள் ஒரு நாளில் 70-க்கும் மேற்பட்ட முறை (மற்றொரு அறிவிப்பில் 100 முறை) 'அஸ்தஃபிருல்லாஹ்' என்று கூறி மன்னிப்புத் தேடினார்கள்.
"மக்களே! நீங்கள் அல்லாஹ்வின் பக்கம் மீளுங்கள் (தவ்பா செய்யுங்கள்). நிச்சயமாக நான் ஒரு நாளில் நூறு முறை அவனிடம் மன்னிப்புக் கோருகிறேன்." நூல்: முஸ்லிம்
99 கொலைகள் செய்த மனிதரின் நிகழ்வு
பனூ இஸ்ரேவேல் வம்சத்தில் ஒரு மனிதன் 99 கொலைகள் செய்தான். மனம் வருந்தி, "எனக்கு மன்னிப்பு உண்டா?" என்று ஒரு துறவியிடம் கேட்டான். அவர் "இல்லை" என்று சொல்ல, அவரையும் சேர்த்து 100 கொலைகளாக மாற்றினான்.
திருப்பம்: மீண்டும் ஒரு அறிஞரிடம் கேட்டபோது, "உனக்கும் மன்னிப்புக்கும் இடையில் தடையாய் இருப்பது யார்? உன் ஊரை விட்டுவிட்டு நல்லவர்கள் வாழும் ஊருக்குச் செல்" என்றார்.
மஅந்த ஊரை நோக்கிச் செல்லும் வழியிலேயே அவன் மரணித்தான். அவன் பயணம் செய்த தூரத்தைக் கணக்கிட்டபோது, அவன் செல்ல வேண்டிய ஊர் (நல்லவர்கள் ஊர்) மிக அருகில் இருந்தது. அவனது உண்மையான வருத்தத்தை ஏற்று அல்லாஹ் அவனை மன்னித்தான்.
எவ்வளவு பெரிய பாவியாக இருந்தாலும், உண்மையான 'தவ்பா' அவரைப் பரிசுத்தமாக்கும்.
ஹழ்ரத் மூஸா (அலைஹிஸ்ஸலாம்) அவர்கள் அல்லாஹ்வுடன் பேசக்கூடிய 'கலீமுல்லாஹ்' என்ற அந்தஸ்து கொண்டவர்கள். ஒருமுறை ஒரு பெண்மணி மிகுந்த நடுக்கத்துடனும், கண்ணீருடனும் மூஸா (அலை) அவர்களிடம் வந்தார்.
பெண்: "அல்லாஹ்வின் தூதரே! நான் ஒரு பெரும் பாவத்தைச் செய்துவிட்டேன். இப்போது அதற்காக மிகவும் வருந்துகிறேன். அல்லாஹ் என்னை மன்னிப்பானா? எனக்காக நீங்கள் பிரார்த்தனை செய்வீர்களா?"
மூஸா (அலை): "பெண்ணே! நீ செய்த பாவம் என்ன?"
பெண்: (தலைகுனிந்து அழுதுகொண்டே) "நான் விபச்சாரம் செய்துவிட்டேன். அதன் மூலம் எனக்கு ஒரு குழந்தை பிறந்தது. அந்தப் பாவத்தை மறைப்பதற்காக அந்தக் குழந்தையை நானே கொன்றும் விட்டேன்."
இதைக் கேட்ட மூஸா (அலை) அவர்கள் கடும் கோபமடைந்தார்கள். "பெண்ணே! இங்கிருந்து உடனே வெளியேறு. உன்னுடைய பாவத்தின் காரணத்தால் வானத்திலிருந்து நெருப்பு இறங்கி எங்களையும் சுட்டெரித்து விடப்போகிறது. இவ்வளவு பெரிய பாவத்தைச் செய்த உனக்கு மன்னிப்பு ஏது?" என்று கூறி அவரை அனுப்பிவிட்டார்கள்.
அந்தப் பெண் மனமுடைந்து, இறைவனின் கருணையை எண்ணி அழுதுகொண்டே அங்கிருந்து சென்றார்.
ஜிப்ரயீல் (அலை) அவர்களின் வருகை:
சற்று நேரத்தில் வானவர் ஜிப்ரயீல் (அலை) அவர்கள் மூஸா (அலை) அவர்களிடம் வந்து ஒரு கேள்வியைக் கேட்டார்கள்:
ஜிப்ரயீல் (அலை): "மூஸாவே! அந்தப் பெண்ணை ஏன் துரத்திவிட்டீர்கள்? அவளை விடப் பெரிய பாவி ஒருவரை நான் உங்களுக்குக் காட்டட்டுமா?"
மூஸா (அலை): (வியப்புடன்) "ஜிப்ரயீலே! விபச்சாரம் செய்து, தன் குழந்தையையும் கொன்ற அந்தப் பெண்ணை விடப் பெரிய பாவி யாராவது இருக்க முடியுமா?"
ஜிப்ரயீல் (அலை): "ஆம் மூஸாவே! யார் வேண்டுமென்றே (அலட்சியமாக) தொழுகையை விடுகிறாரோ, அவர்தான் அந்தப் பெண்ணை விடப் பெரிய பாவி."
இதைக் கேட்ட மூஸா (அலை) அவர்கள் அதிர்ச்சியடைந்தார்கள். உடனே அந்தப் பெண்ணைத் தேடி அழைத்து வரச் செய்து, அவருக்குப் பாவமன்னிப்புக்கான வழியைக் கூறி, அல்லாஹ்விடம் துஆ செய்தார்கள்.
நூல்:தர்கீப் வத் தர்ஹீப்'
எவ்வளவு பெரிய பாவியாக இருந்தாலும், அவர் வருந்தி வரும்போது அவருக்கு மன்னிப்பின் வாசலை மூடிவிடக் கூடாது.
அல்லாஹ்வின் ரஹ்மத் பெரிது அல்லாஹ்விடம் உண்மையாக வருந்தினால், அவன் எத்தகைய பாவத்தையும் மன்னிக்கக் கூடியவன்.
அல்லாஹ்வின் பயத்தால் அழுதவர்கள்
ஸாபித் அல்-புனானி ரஹ்மத்துல்லாஹி அலைஹி) அவர்கள் ஒரு மாபெரும் தாபிஃயீ (சஹாபாக்களைக் கண்டவர்) மற்றும் இமாம் அனஸ் இப்னு மாலிக் (ரலியல்லாஹு அன்ஹு அவர்களின் நெருக்கமான மாணவர் ஆவார்.
இவருடைய வாழ்க்கை வரலாறு முழுக்க முழுக்க வணக்க வழிபாடுகளாலும், கண்ணீரினாலும் நிறைந்தவை.
இமாம் ஸாபித் ரஹ்மதுல்லாஹி அலைஹி அவர்கள் ஒவ்வொரு நாளும் ஒருமுறை குர்ஆனை முழுமையாக ஓதி முடிப்பார்கள். அவர்கள் 40 ஆண்டுகள் வரை ஒவ்வொரு இரவும் விழித்திருந்து தொழுதுள்ளார்கள். இவருடைய இறைவணக்கத்தைப் பார்த்து இமாம் அனஸ் ரலியல்லாஹு அன்ஹு அவர்கள் கூறினார்கள்:
"ஸாபித்! நிச்சயமாக உன்னிடம் ஒரு மணம் இருக்கிறது, அது சொர்க்கத்தின் மணம்!"
ஸாபித் (ரஹ்மதுல்லாஹி அலைஹி அவர்கள் அல்லாஹ்வைப் பற்றிய அச்சத்தினால் அதிகமாக அழக்கூடியவர்கள். எவ்வளவு அழுவார்கள் என்றால், அழுகையினால் அவர்களுடைய கண்கள் பாதிக்கப்பட்டு பார்வை பறிபோகும் நிலை ஏற்பட்டது.
அவரது கண்ணில் ஏற்பட்ட பாதிப்பைப் பார்த்த மருத்துவர் ஒருவர் வந்து, "இமாம் அவர்களே! நான் உங்கள் கண்ணைக் குணப்படுத்துகிறேன், ஆனால் ஒரு நிபந்தனை. நீங்கள் அழுவதை நிறுத்த வேண்டும்" என்றார்.
பதில்: அதற்கு ஸாபித் (ரஹ்) அவர்கள், "அழாத கண்ணில் என்ன பயன் இருக்கிறது? கண்ணீரினால் வராத சுகம் எனக்கு வேண்டாம்" என்று கூறிவிட்டு, தொடர்ந்து இறைவனை நினைத்து அழுவதையே தேர்ந்தெடுத்தார்கள்.
3. மண்ணறையில் (கப்ரில்) தொழுகை கேட்ட வரலாறு
இது இவருடைய வரலாற்றில் மிக அதிசயமான மற்றும் பிரபலமான நிகழ்வாகும்.
* துஆ: தாபித் (ரஹ்) அவர்கள் தன் வாழ்நாளில் எப்போதும் ஒரு துஆவை அல்லாஹ்விடம் கேட்டுக்கொண்டே இருப்பார்கள்: "யா அல்லாஹ்! என் மரணத்திற்குப் பிறகு யாராவது ஒரு மனிதருக்கு கப்ரிலே தொழும் பாக்கியத்தை நீ வழங்குவதாக இருந்தால், அந்தப் பாக்கியத்தை எனக்கு வழங்குவாயாக!"
* நிகழ்வு: அவர்கள் மரணித்து அடக்கம் செய்யப்பட்ட பிறகு, அவரது கப்ரைத் தோண்டிச் சரிசெய்ய வேண்டிய ஒரு சூழல் ஏற்பட்டது. அப்போது அங்கிருந்தவர்கள் கண்ட காட்சி திகைக்க வைத்தது. ஸாபித் அல்-புனானி (ரஹ்மதுல்லாஹி அலைஹி) அவர்கள் கப்ரிலே நின்று தொழுது கொண்டிருந்தார்கள்.
இந்த அதிசய நிகழ்வை இமாம் இப்னுல் கய்யிம் ரஹ்மதுல்லாஹி அலைஹி அவர்கள் தனது "கிதாபுர் ரூஹ்" (ஆன்மா பற்றிய நூல்) எனும் நூலில் பதிவு செய்துள்ளார்கள். மேலும், இமாம் அபு நுஐம் அஸ்பஹானி (ரஹ்) அவர்கள் "ஹில்யதுல் அவ்லியா" எனும் நூலிலும் இதனை ஆதாரங்களுடன் குறிப்பிட்டுள்ளார்கள்.
தவ்பா பற்றி அவர்கள் கூறிய வாசகம்
பாவமன்னிப்புத் தேடி வரும் ஒருவரிடம் அவர்கள் ஒருமுறை இப்படிக் கூறினார்கள்:
"அல்லாஹ் எப்போது உன்னை மன்னிப்பான் என்பதை நான் அறிவேன்."
மக்கள் ஆச்சரியத்துடன், "அது எப்படித் தெரியும்?" எனக் கேட்டனர். அதற்கு அவர்கள், "எப்போது ஒரு அடியானின் உள்ளத்தில் தான் செய்த தவறுக்காக உண்மையான வருத்தம் ஏற்பட்டு, அவன் கையேந்தி அல்லாஹ்விடம் 'யா அல்லாஹ்!' என அழைக்கிறானோ, அந்த விநாடியே அல்லாஹ் அவனை மன்னித்துவிட்டான் என்று அர்த்தம்" என்றார்கள்.
நூல்:ஹில்யதுல் அவ்லியா,ஸியரு அஃலாமின் நுபலா
"மக்களே! நம் கண்கள் உலக விஷயங்களுக்காக அழுகின்றன. ஆனால் அல்லாஹ்வுக்காகவும், நம் பாவங்களுக்காகவும் ஒரு சொட்டுக் கண்ணீர் வடித்தால், அது நரக நெருப்பை அணைத்துவிடும்.
மாலிக் இப்னு தீனார் (ரஹ்) அவர்களின் மனமாற்றம்
மாலிக் இப்னு தீனார் (ரஹ்மதுல்லாஹி அலைஹி) அவர்கள் ஆரம்ப காலத்தில் மார்க்கப் பற்று இல்லாதவராகவும், மது அருந்துபவராகவும், அநியாயக்காரராகவும் இருந்தார்கள்.
மகளின் மீது கொண்ட பாசம்
அவருக்கு ஒரு பெண் குழந்தை இருந்தது. அவளிடம் அவர் மிகுந்த அன்பு கொண்டிருந்தார். அந்த குழந்தை தவழ்ந்து வரும்போது, அவர் மது அருந்தும் கோப்பையைத் தட்டிவிடுவது வழக்கம். ஆனால், துரதிர்ஷ்டவசமாக அந்த குழந்தை இரண்டு வயதிலேயே மரணமடைந்தது. மாலிக் இப்னு தீனார் கடும் வேதனையில் மீண்டும் மதுவில் மூழ்கினார்.
அந்த பயங்கரமான கனவு
ஒரு இரவு அவர் மது அருந்திவிட்டு உறங்கும்போது ஒரு கனவு கண்டார்.
* கனவில் கியாமத் நாள் (மறுமை நாள்) வந்துவிட்டது. மக்கள் அனைவரும் அஞ்சி ஓடுகிறார்கள்.
* ஒரு பிரம்மாண்டமான மலைப்பாம்பு வாயைத் திறந்தபடி மாலிக்கைத் துரத்துகிறது.
* அவர் தப்பித்து ஓடும்போது ஒரு பலவீனமான முதியவரைச் சந்தித்து உதவி கேட்கிறார். அவர், "நானோ பலவீனமானவன், நீ அந்த மலைப் பக்கமாக ஓடு" என்கிறார்.
சொர்க்கத்தின் காட்சி
மலைப் பக்கம் ஓடியபோது அங்கே ஒரு அழகான கோட்டை இருந்தது. அங்கிருந்து ஒரு குரல் கேட்டது: "இங்கே பாருங்கள், இந்த மனிதருக்கு யாராவது அடைக்கலம் தர முடியுமா?"
அப்போது அக்கோட்டையிலிருந்து அவருடைய மறைந்த சிறுமி (மகள்) ஓடி வந்தாள். அவள் தனது இடது கையால் தன் தந்தையைப் பிடித்துக்கொண்டு, வலது கையால் அந்தப் பாம்பைத் தடுத்தாள். அந்தப் பாம்பு ஓடிவிட்டது.
மகளின் அறிவுரை
அப்போது அந்தச் சிறுமி தன் தந்தையிடம் குர்ஆனின் இந்த வசனத்தை ஓதிக்காட்டினாள்
اَلَمْ يَاْنِ لِلَّذِيْنَ اٰمَنُوْۤا
اَنْ تَخْشَعَ قُلُوْبُهُمْ لِذِكْرِ اللّٰهِ وَمَا نَزَلَ مِنَ الْحَـقِّۙ وَلَا يَكُوْنُوْا كَالَّذِيْنَ اُوْتُوا الْكِتٰبَ مِنْ قَبْلُ فَطَالَ عَلَيْهِمُ الْاَمَدُ فَقَسَتْ قُلُوْبُهُمْ وَكَثِيْرٌ مِّنْهُمْ فٰسِقُوْنَ
ஈமான் கொண்டார்களே அவர்களுக்கு, அவர்களுடைய இருதயங்கள் அல்லாஹ்வையும், இறங்கியுள்ள உண்மையான (வேதத்)தையும் நினைத்தால், அஞ்சி நடுங்கும் நேரம் வரவில்லையா? மேலும், அவர்கள் - முன்னால் வேதம் கொடுக்கப்பட்டவர்களைப் போல் ஆகிவிட வேண்டாம்; (ஏனெனில்) அவர்கள் மீது நீண்ட காலம் சென்ற பின் அவர்களுடைய இருதயங்கள் கடினமாகி விட்டன; அன்றியும், அவர்களில் பெரும்பாலோர் ஃபாஸிக்குகளாக - பாவிகளாக ஆகிவிட்டனர்.
(அல்குர்ஆன் : 57:16)
மாலிக் (ரஹ்மதுல்லாஹி அலைஹி) அவர்கள் கேட்டார்: "மகளே! அந்தப் பாம்பு என்ன? அந்த முதியவர் யார்?"
அதற்கு அவள்: "தந்தையே! அந்தப் பாம்பு உங்கள் தீய செயல்கள். அது உங்களை நரகத்தில் தள்ளத் துரத்தியது. அந்த முதியவர் உங்கள் நற்செயல்கள். அவை மிகக் குறைவாக இருந்ததால் அவரால் உங்களுக்கு உதவ முடியவில்லை" என்றாள்.
திடுக்கிட்டு எழுந்த மாலிக் இப்னு தீனார் (ரஹ்மதுல்லாஹி அலைஹி), அவர்கள் உடனே அழுது அழுது அல்லாஹ்விடம் மன்னிப்பு கேட்டார்கள். "யா அல்லாஹ்! இதோ அந்த நேரம் வந்துவிட்டது, என்னை மன்னித்து ஏற்றுக்கொள்" என்று கதறினார்.
அன்றிலிருந்து அவர் மதுவைத் தொட்டதே இல்லை. தனது வாழ்நாள் முழுவதையும் இறைவணக்கத்திலும், மக்களுக்கு நற்போதனை செய்வதிலும் கழித்து ஒரு பெரும் இறைநேசராக (வலியுல்லாஹ்) மாறினார்.
நம்முடைய தீய செயல்கள் மறுமையில் நமக்குத் தீங்கு விளைவிக்கும் பாம்பாக மாறும்.
எவ்வளவு பெரிய பாவியாக இருந்தாலும், குர்ஆன் வசனத்தைக் கேட்டு நம் உள்ளம் உருக வேண்டிய நேரம் இதுதான்.
சிறுவயதில் மரணிக்கும் குழந்தைகள் மறுமையில் பெற்றோருக்காகப் பரிந்துரைப்பார்கள்.
நூல்: தவ்புந் நுஸூஹா (Tawbat al-Nasuha) - இமாம் இப்னு குதாமா.
* நவாதிருல் கல்யூபி (Nawadir al-Qalyubi).
மரணத் தூதுவர் இஸ்ராயீல் அலைஹிஸ்ஸலாம் அவர்கள் நம்மைத் தேடி வருவதற்கு முன்னால், நம் கண்கள் மூடுவதற்கு முன்னால், இந்த புனிதமான மாதத்தின் இரவுகளில் நாம் அழுது மன்னிப்பு கேட்போம்.
நாம் செய்த பாவங்களை நினைத்து ஒரு சொட்டுக் கண்ணீர் வடித்தால், அது நம் வாழ்நாள் பாவங்களை எரித்துச் சாம்பலாக்கிவிடும்.
இன்று இரவே நாம் ஒரு புதிய மனிதராக, அல்லாஹ்வின் நேசத்திற்குரிய அடியாராக மாறுவோம்.
யா அல்லாஹ்! இந்த புனிதமான மாதத்தில் எத்தனையோ அடியார்களை நரக நெருப்பிலிருந்து விடுதலை செய்கிறாய். அந்த பாக்கியம் பெற்ற அடியார்களில் எங்களையும், எங்கள் பெற்றோர், உற்றார் உறவினர்களையும் சேர்த்துக்கொள்வாயாக!
யா அல்லாஹ்! எஞ்சியிருக்கும் எம் வாழ்நாளை உனக்குப் பிடித்தமான அமல்கள் செய்து கழிக்க அருள் புரிவாயாக!
யா அல்லாஹ்! எங்களின் இறுதி மூச்சு பிரியும்போது 'லா இலாஹ இல்லல்லாஹ்
' என்ற கலிமாவுடன், உனக்கு மிகவும் நெருக்கமான நிலையில் மரணிக்கும் பாக்கியத்தை எங்களுக்கும், உலகிலுள்ள அனைத்து முஸ்லிம்களுக்கும் நசீபாக்குவாயாக!”
ஆமீன் யாரப்பல் ஆலமீன்.
தொகுத்தவர்.
மவ்லவி B.முஹம்மது ராஃபி ரஷீதி.
தலைமை இமாம். மஸ்ஜிதே முபாரக் கிருஷ்ணாம்பேட்டை அரக்கோணம்.
Cell : +91 90949 86824.
முந்தைய பதிவுகள் வாசிக்க 👇 கிளிக் செய்யவும்.
கருத்துகள் இல்லை:
கருத்துரையிடுக