தராவீஹ் பயான் பிறை – 9
தலைப்பு : “உம்மத்திற்காக உருகிய நபி ﷺ –”
ஹிஜ்ரி 1447.
بسم الله الرحمن الرحيم
الحمد لله رب العالمين عدد خلقه ورضا نفسه وزنة عرشه ومداد كلماته الصلاة والسلام على رسول الله صلى الله عليه وسلم وعلى آله وأصحابه وأهل بيته أجمعين أما بعد
لَـقَدْ جَآءَكُمْ رَسُوْلٌ مِّنْ اَنْفُسِكُمْ عَزِيْزٌ عَلَيْهِ مَا عَنِتُّمْ حَرِيْصٌ عَلَيْكُمْ بِالْمُؤْمِنِيْنَ رَءُوْفٌ رَّحِيْمٌ
முஃமின்களே!) நிச்சயமாக உங்களிலிருந்தே ஒரு தூதர் உங்களிடம் வந்திருக்கின்றார்; நீங்கள் துன்பத்திற்குள்ளாகி விட்டால், அது அவருக்கு மிக்க வருத்தத்தைக் கொடுக்கின்றது; அன்றி, உங்(கள் நன்மை)களையே அவர் பெரிதும் விரும்புகிறார்; இன்னும் முஃமின்கள் மீது மிக்க கருணையும் கிருபையும் உடையவராக இருக்கின்றார்.(அல்குர்ஆன் : 9:128
فَاِنْ تَوَلَّوْا فَقُلْ حَسْبِىَ اللّٰهُ لَاۤ اِلٰهَ اِلَّا هُوَ عَلَيْهِ تَوَكَّلْتُ وَهُوَ رَبُّ الْعَرْشِ الْعَظِيْمِ
நபியே! இதன்) பின்னரும், அவர்கள் (உங்களை விட்டு) விலகி விட்டால் (அவர்களை நோக்கி,) “எனக்கு அல்லாஹ்வே போதுமானவன். (வழிபடுவதற்குரிய) நாயன் அவனையன்றி (வேறுயாரும்) இல்லை; அவன் மீதே நான் பரிபூரண நம்பிக்கை கொண்டுள்ளேன் - அவன் தான் மகத்தான அரியாசனத்தின் (அர்ஷின்) அதிபதி” என்று நீர் கூறுவீராக! (அல்குர்ஆன் : 9:129)
இன்று தராவீஹ் தொழுகையில் ஓதப்பட்ட ஸூரா அத்தவ்பா அத்தியாயத்தின் இறுதி இரு வசனங்கள் மிக முக்கியமானவை…
சூரா அத்தவ்பாவின் இந்த வசனங்கள், தபூக் போருக்குப் பிந்தைய சூழலை
விளக்குகிறது. அப்போது முனாஃபிக்குகளின் (நயவஞ்சகர்களின்) தொல்லைகள் அதிகமாக இருந்தன. அந்த இக்கட்டான நேரத்தில், "மக்கள் உங்களைப் புறக்கணித்தாலும் கவலைப்படாதீர்கள், அல்லாஹ் உங்களுக்குப் போதும்" (9:129) என்ற செய்தி நபிகளாருக்கும் அவரது தோழர்களுக்கும் மிகப்பெரிய மன வலிமையைத் தந்தது.
மிகச்சிறந்த குர்ஆன் விரிவுரையாளரான உபை இப்னு கஅப் ரலியல்லாஹு அன்ஹு அவர்கள் கூறுகிறார்கள்: "இந்த இரண்டு வசனங்கள்தான் வானத்திலிருந்து கடைசியாக இறக்கப்பட்டவை. அதாவது, அல்லாஹ்வுடன் (மறுமையில்) சந்திப்பதைப் பற்றியும், அவனுடைய அரியாசனத்தைப் (அர்ஷ்) பற்றியும் பேசி இந்தத் தூதுத்துவச் செய்தி நிறைவு பெறுகிறது.”
வரலாற்று ரீதியாகப் பார்த்தால், நபி ஸல்லல்லாஹு அலைஹி வஸல்லம் அவர்களின் மரணத்திற்குச் சற்று முன்னதாகவே இந்த வசனங்கள் அவர்களின் சிறப்புகளைப் போற்றும் விதமாக அமைந்தன. ஒரு தந்தை தன் பிள்ளைகள் மீது காட்டும் அக்கறையை விட மேலாக, தன் உம்மத்தின் மீது நபிகளார் கொண்டிருந்த அன்பை அல்லாஹ் இந்த வசனங்கள் மூலம் உலகிற்குப் பறைசாற்றினான்.
சில அறிவிப்புகளில், இந்த வசனங்கள் குர்ஆனில் கடைசியாக அருளப்பட்டவை என்றும், இது ஒரு முஃமினுக்கு இறுதிவரை உறுதியைத் தரும் என்றும் கூறப்பட்டுள்ளது.
குர்ஆன் தொகுக்கப்பட்ட வரலாறு சையிதினா ஜைத் இப்னு ஸாபித் ரலியல்லாஹு அன்ஹு அவர்களின் சாட்சியம்
முதன்முதலில் ஹிஜ்ரி 12-ல் அபூபக்கர் சித்தீக் ரலியல்லாஹு அன்ஹு அவர்களின் காலத்தில் குர்ஆன் ஒரு புத்தகமாகத் தொகுக்கப்பட்ட போது, ஒவ்வொரு வசனத்திற்கும் குறைந்தது இரண்டு சாட்சிகள் தேவைப்பட்டன. ஆனால், இந்த இறுதி இரு வசனங்களை (128 மற்றும் 129) அபூ குஸைமா அல்-அன்சாரி ரலியல்லாஹு அன்ஹு என்ற தோழரிடம் மட்டுமே ஜைத் இப்னு ஸாபித் (ரலியல்லாஹு அன்ஹு அவர்கள் கண்டெடுத்தார்கள்.
இந்த வசனங்கள் குர்ஆனின் ஒரு பகுதிதான் என்பதில் யாருக்கும் சந்தேகம் இருக்கவில்லை. ஏனெனில், நபி ஸல்லல்லாஹு அலைஹி வஸல்லம் அவர்கள் ஏற்கனவே அபூ குஸைமா ரலியல்லாஹு அன்ஹு அவர்களின் ஒரு சாட்சியத்தை இரண்டு பேரின் சாட்சியத்திற்குச் சமம் என்று அறிவித்திருந்தார்கள். குர்ஆன் தொகுக்கப்படும்போது இந்த இரு வசனங்களை இணைக்க ஆதாரமாக அமைந்தது.
அபூ குஸைமா ரலியல்லாஹு அன்ஹு அவர்களின் சாட்சியம் இருவரின் சாட்சியத்திற்குச் சமமானது என்ற வரலாற்று நிகழ்வு, இஸ்லாமிய வரலாற்றில் "ஷஹாதத்து குஸைமா" (குஸைமாவின் சாட்சியம்) என்று புகழ்பெற்றது.
ஒருமுறை அல்லாஹ்வின் தூதர் ஸல்லல்லாஹு அலைஹி வஸல்லம் அவர்கள் ஒரு கிராமவாசியிடம் (அஃராபி) ஒரு குதிரையை விலைக்கு வாங்கினார்கள். நபியவர்கள் பணத்தைக் கொண்டு வர வீட்டிற்குச் சென்றார்கள். அந்த இடைவெளியில், மற்றொருவர் வந்து அந்த கிராமவாசியிடம் அந்தக் குதிரைக்கு அதிக விலை தருவதாகக் கூறினார்.
அந்த கிராமவாசி பேராசையினால், நபியவர்களிடம், "நீர் இந்தக் குதிரையை வாங்குவதாக இருந்தால் இப்போதே பணத்தைக் கொடு, இல்லையெனில் நான் வேறு ஒருவருக்கு விற்றுவிடுவேன்" என்று கூறினான்.
நபியவர்கள் அவரிடம், "நான் ஏற்கனவே உன்னிடம் இதனை விலைக்கு வாங்கிவிட்டேனே!" என்றார்கள். அதற்கு அந்த கிராமவாசி, "இல்லை, நீர் வாங்கவில்லை. நான் உமக்கு விற்றேன் என்பதற்கு ஏதேனும் சாட்சி இருக்கிறதா?" என்று திமிராகக் கேட்டான்.
அங்கே கூடியிருந்த மக்கள், "அல்லாஹ்வின் தூதரிடமா சாட்சி கேட்கிறாய்? அவர் உண்மையைத் தவிர வேறொன்றையும் கூறமாட்டார்" என்றனர். அப்பொழுது அங்கே வந்த குஸைமா இப்னு ஸாபித் ரலியல்லாஹு அன்ஹு அவர்கள், "நானே சாட்சி! அல்லாஹ்வின் தூதர் ஸல்லல்லாஹு அலைஹி வஸல்லம் அவர்கள் உன்னிடம் அந்தக் குதிரையை வாங்கிவிட்டார்கள் என்பதற்கு நான் சாட்சி கூறுகிறேன்" என்றார்கள்.
அந்த கிராமவாசி சென்ற பிறகு, நபியவர்கள் குஸைமா ரலியல்லாஹு அன்ஹு அவர்களை அழைத்து, "குஸைமாவே! நாம் வியாபாரம் செய்தபோது நீர் அங்கே இல்லையே, பிறகு எப்படி சாட்சி கூறினீர்?" என்று கேட்டார்கள்.
அதற்கு குஸைமா ரலியல்லாஹு அன்ஹு அவர்கள் மிக அழகாகப் பதிலளித்தார்கள்:
"அல்லாஹ்வின் தூதரே! நீங்கள் விண்ணிலிருந்து வரும் செய்தியை (வஹீ) இறைவனிடமிருந்து கொண்டு வருகிறீர்கள் என்று சொன்னீர்கள்; நாங்கள் அதை நம்பினோம். நீங்கள் மறுமையைப் பற்றிச் சொன்னீர்கள்; அதையும் நம்பினோம். உங்களை உண்மைப்படுத்திய நாங்கள், இந்த ஒரு சாதாரணக் குதிரை விஷயத்தில் நீங்கள் பொய் சொல்வீர்கள் என்று எப்படி நினைப்போம்? எனவேதான் உங்கள் சொல்லின் மீதுள்ள நம்பிக்கையினால் நான் சாட்சி சொன்னேன்."
இதைக் கேட்டு நெகிழ்ந்த நபிகள் நாயகம் ஸல்லல்லாஹு அலைஹி வஸல்லம் அவர்கள்:
"எவருக்கு குஸைமா சாட்சி சொல்கிறாரோ, அல்லது எவருக்கு எதிராக அவர் சாட்சி சொல்கிறாரோ, அவருக்கு குஸைமா ஒருவரின் சாட்சியமே போதுமானது (அது இருவரின் சாட்சியத்திற்குச் சமம்)" என்று அறிவித்தார்கள்.
அந்த ஒரு சாட்சியத்தை ஆதாரமாகக் கொண்டு அந்த வசனங்கள் குர்ஆனில் இணைக்கப்பட்டன.
இந்த வசனத்தில் "ஹரீசுன் அலைக்கும்" (حَرِيْصٌ عَلَيْكُمْ) என்ற பதம் பயன்படுத்தப்பட்டுள்ளது. 'ஹரீஸ்' என்றால் ஒரு பொருளின் மீது மிகுந்த பேராசை கொண்டவர் என்று பொருள். ஆனால் இங்கே, "நீங்கள் அனைவரும் நேர்வழி பெற்று, நரக நெருப்பிலிருந்து தப்பித்து, சுவனம் செல்ல வேண்டும்" என்பதில் நபிகளார் காட்டிய பேராசை போன்ற அளவற்ற அக்கறையை இது குறிக்கிறது. தன் உம்மத்தினர் (சமுதாயத்தினர்) ஒரு சிறிய துன்பத்திற்கு ஆளானாலும், அது நபிகளாருக்குப் பெரிய வலியைக் கொடுத்தது என்பதை இந்த வசனம் படம் பிடித்துக் காட்டுகிறது.
"மின்ன அன்ஃபுஸிக்கும்" (உங்களிலிருந்தே ஒருவர்) என்பதன் சிறப்பு:
அல்லாஹ் வானவர்களையோ அல்லது வேறு படைப்பையோ தூதராக அனுப்பியிருக்கலாம். ஆனால், "உங்களிலிருந்தே" (மனுஷ சமூகத்திலிருந்தே) ஒருவரை அனுப்பியதன் மூலம்:
* அவர் நம்முடைய பசி, தாகம், வலி மற்றும் உணர்ச்சிகளைப் புரிந்து கொண்டவராக இருந்தார்.
* அவரைப் பின்பற்றுவது நமக்கு எளிதாக அமைந்தது.
* ஒரு மனிதரால் இவ்வளவு உயர்ந்த ஒழுக்கத்தைப் பேண முடியும் என்பதற்கு அவரே முன்மாதிரியாகத் திகழ்ந்தார்.
தன் உம்மத்திற்காக அழுது துஆ
ஒருமுறை நபி ஸல்லல்லாஹு அலைஹி வஸல்லம் அவர்கள் குர்ஆனில் உள்ள முந்தைய நபிமார்களின் இரு வசனங்களை ஓதிக்கொண்டிருந்தார்கள்.
இப்ராஹீம் அலைஹிஸ்ஸலாம் அவர்களின் துஆ:
"என் இறைவனே! இந்த சிலைகள் மனிதர்களில் அநேகரை வழிதவறச் செய்துவிட்டன. எனவே, எவர் என்னைப் பின்பற்றுகிறாரோ அவர் என்னைச் சேர்ந்தவர்..." (குர்ஆன் 14:36) - அதாவது, பாவம் செய்தவர்களையும் மன்னிக்கும்படி இப்ராஹீம் அலைஹிஸ்ஸலாம் அவர்கள் இறைவனிடம் வேண்டினார்கள்.
ஈஸா அலைஹிஸ்ஸலாம் அவர்களின் துஆ:
"நீ அவர்களைத் தண்டித்தால் அவர்கள் உன்னுடைய அடியார்களே! அவர்களை நீ மன்னித்தால், நிச்சயமாக நீயே மிகைத்தவனாகவும் ஞானமிக்கவனாகவும் இருக்கிறாய்." (குர்ஆன் 5:118)
இந்த வசனங்களை ஓதி முடித்ததும், நபி ஸல்லல்லாஹு அலைஹி வஸல்லம் அவர்களுக்குத் தன் உம்மத்தின் (சமுதாயத்தின்) நிலை குறித்து மிகுந்த கவலை ஏற்பட்டது. உடனே அவர்கள் தன் இரு கரங்களையும் ஏந்தி, வானத்தை நோக்கி உயர்த்தி:
"யா அல்லாஹ்! உம்மத்தீ... உம்மத்தீ..." (என் இறைவனே! என் சமுதாயம்... என் சமுதாயம்...)
என்று கதறி அழுதார்கள். நபியவர்களின் அழுகைச் சத்தம் விண்ணைத் தொட்டது.
அல்லாஹ்வின் பதில்:
அப்போது அல்லாஹ் (அனைத்தையும் அறிந்தவனாக இருந்தும்) வானவர் ஜிப்ரயீல் அலைஹிஸ்ஸலாம் அவர்களை அழைத்து, "ஜிப்ரயீலே! முஹம்மதிடம் சென்று, அவர் ஏன் அழுகிறார் என்று கேட்டு வாரும்" என்று கட்டளையிட்டான்.
ஜிப்ரயீல் அலைஹிஸ்ஸலாம் அவர்கள் இறங்கி வந்து நபியவர்களிடம் கேட்டபோது, அவர்கள் தன் உம்மத்தின் மறுமை நிலை குறித்தும், அவர்களின் பாவங்கள் மன்னிக்கப்பட வேண்டும் என்பது குறித்தும் தான் கவலைப்படுவதாகக் கூறினார்கள்.
ஜிப்ரயீல் அலைஹிஸ்ஸலாம் அவர்கள் மீண்டும் இறைவனிடம் சென்று விபரத்தைக் கூறினார்கள். அப்போது அல்லாஹ் கூறினான்:
"ஜிப்ரயீலே! அலைஹிஸ்ஸலாம் முஹம்மதிடம் ஸல்லல்லாஹு அலைஹி வஸல்லம் அவர்களிடம் சென்று சொல்லும்: உமது உம்மத்தின் விஷயத்தில் நாம் உம்மைத் திருப்திப்படுத்துவோம்; உம்மை நாம் ஒருபோதும் கவலையடையச் செய்ய மாட்டோம்." நூல் முஸ்லிம்
"உம்மைத் திருப்திப்படுத்துவோம்" என்பது, மறுமை நாளில் நபி (ஸல்) அவர்கள் தன் உம்மத்திற்காகச் செய்யும் பரிந்துரையை (ஷஃபாஅத்) அல்லாஹ் ஏற்றுக்கொண்டு, அவர்களின் பாவங்களை மன்னித்து சுவனத்தில் சேர்ப்பான் என்பதைக் குறிக்கிறது.
மறுமை நாளில் நபி (ஸல்) அவர்கள் தனது உம்மத்திற்காக துஆ
அல்லாஹ் ஒவ்வொரு நபிக்கும் ஒரு 'அங்கீகரிக்கப்பட்ட துஆ'வை (துஆ முஸ்தஜாப்) வழங்கியிருந்தான். அந்தத் துஆவை அவர்கள் எப்போது கேட்டாலும் அல்லாஹ் அதை மறுக்காமல் நிறைவேற்றுவான்.
வரலாற்று ரீதியாக, மற்ற நபிமார்கள் அந்த வாய்ப்பைத் தங்களின் சமுதாயத்திற்காகவோ அல்லது தங்களை எதிர்த்தவர்களுக்கு எதிராகவோ இந்த உலகிலேயே பயன்படுத்திவிட்டார்கள்.
* உதாரணமாக: நூஹ் அலைஹிஸ்ஸலாம் அவர்கள் தனது சமுதாயத்தின் அநீதியைக் கண்டு, "இறைவா! இந்தப் பூமியில் காஃபிர்களில் ஒருவரையும் விட்டு வைக்காதே" என்று துஆ செய்தார்கள் (குர்ஆன் 71:26).
நபி ஸல்லல்லாஹு அலைஹி வஸல்லம் அவர்களின் தீர்க்கதரிசனமான முடிவு
ஆனால், ரசூலுல்லாஹ் ஸல்லல்லாஹு அலைஹி வஸல்லம் அவர்கள் அந்தத் துஆவை இம்மையின் இன்பங்களுக்காகவோ அல்லது தன்னைத் துன்புறுத்தியவர்களுக்கு எதிராகவோ பயன்படுத்தவில்லை. அவர்கள் கூறினார்கள்:
"ஒவ்வொரு நபிக்கும் (நிச்சயமாகக் கபூல் செய்யப்படும்) ஓர் அங்கீகரிக்கப்பட்ட பிரார்த்தனை உண்டு. எல்லா நபிமார்களும் தத்தமது அந்தப் பிரார்த்தனையை இம்மையிலேயே (விரைந்து) செய்துவிட்டார்கள். நான் எனது அந்தப் பிரார்த்தனையை மறுமை நாளில் எனது உம்மத்தினருக்குப் பரிந்துரை (ஷஃபாஅத்) செய்வதற்காகப் பாதுகாத்து வைத்துள்ளேன். இன்ஷா அல்லாஹ், என் உம்மத்தில் அல்லாஹ்வுக்கு எதையும் இணைவைக்காமல் மரணித்த அனைவருக்கும் அந்தப் பரிந்துரை கிடைக்கும்." நூல்: புகாரி:
மறுமை நாளில் அந்தப் பிரார்த்தனை நிகழும் விதம் (ஷஃபாஅத் அல்-உழ்மா)
மறுமை நாளில் (மஹ்ஷர் மைதானத்தில்) சூரியன் மிக அருகில் வந்து, மக்கள் அனைவரும் தங்களின் பாவங்களுக்கு ஏற்ப வேர்வையில் மூழ்கி, விசாரணையின் தாமதத்தால் சொல்லொண்ணாத் துயரத்தில் இருப்பார்கள்.
அப்போது மக்கள் வரிசையாக ஆதம் அலைஹிஸ்ஸலாம், நூஹ் அலைஹிஸ்ஸலாம் இப்ராஹீம் அலைஹிஸ்ஸலாம் மூஸா அலைஹிஸ்ஸலாம், ஈஸா அலைஹிஸ்ஸலாம் ஆகியோரிடம் சென்று "அல்லாஹ்விடம் எங்களுக்காகப் பரிந்துரை செய்யுங்கள்" என்று கெஞ்சுவார்கள். ஒவ்வொரு நபியும் ஏதோ ஒரு காரணத்தைக் கூறி "நஃப்சீ... நஃப்சீ..." (என் நிலை என்னவோ?) என்று கைவிரித்து விடுவார்கள்.
இறுதியாக மக்கள் முஹம்மது (ஸல்) அவர்களிடம் வருவார்கள். அப்போது நபியவர்கள்:
"அன லஹா... அன லஹா..." (இதற்கு நான் இருக்கிறேன்! இதற்கு நான் இருக்கிறேன்!) என்று கூறுவார்கள்.
அர்ஷின் கீழ் ஸஜ்தா செய்தல்
நபி ஸல்லல்லாஹு அலைஹி வஸல்லம் அவர்கள் அல்லாஹ்வின் அர்ஷுக்குக் கீழே சென்று விழுந்து ஸஜ்தா செய்வார்கள். அப்போது அல்லாஹ் அவர்களுக்குச் சொல்லிக்கொடுக்கும் சில சிறப்பான புகழாரங்களைக் கொண்டு அல்லாஹ்வைத் துதிப்பார்கள். நீண்ட நேரத்திற்குப் பிறகு அல்லாஹ் கூறுவான்:
"முஹம்மதே! உமது தலையை உயர்த்தும்! கேளும், உமக்குக் கொடுக்கப்படும். பரிந்துரை செய்யும், உமது பரிந்துரை ஏற்கப்படும்!"
அப்போதுதான் நபியவர்கள் தனது அந்த 'தனித்துவமான' பிரார்த்தனையைப் பயன்படுத்தி, "யா அல்லாஹ்! என் உம்மத்தினர்... என் உம்மத்தினர்..." என்று பரிந்துரை செய்வார்கள். இதன் மூலமே விசாரணைகள் தொடங்கி, முஃமின்கள் சுவனம் செல்ல வழிவகை செய்யப்படும். நூல்: புகாரி
அன்பின் உச்சம் உலகமே "எனக்கு என்ன ஆகுமோ?" என்று கவலைப்படும் நாளில், தன் உம்மத்தைப் பற்றி மட்டுமே கவலைப்படும் ஒரே தலைவராக நபியவர்கள் இருப்பார்கள்.
இறுதி உபதேசம்:
"தொழுகையைப் பேணுங்கள்"
மரணத் தருவாயில் நபி ஸல்லல்லாஹு அலைஹி வஸல்லம் அவர்களின் குரல் மிகவும் குறைந்து, பேசுவதற்கே சிரமப்பட்ட நிலையில் இருந்தார்கள். அப்போது அவர்கள் மீண்டும் மீண்டும் ஒரு விஷயத்தை வலியுறுத்திக் கொண்டே இருந்தார்கள்.
அன்னை ஆயிஷா ரலியல்லாஹு அன்ஹா மற்றும் அனஸ் ரலியல்லாஹு அன்ஹு ஆகியோர் அறிவிக்கிறார்கள்:
நபியவர்களின் உயிர் பிரியும் வேளையில், அவர்களின் மார்பிலிருந்து ஒருவிதமான மூச்சொலி வந்து கொண்டிருந்தது. அந்த நிலையிலும் அவர்கள் கூறிய வார்த்தைகள்:
"அஸ்ஸலாஹ்... அஸ்ஸலாஹ்... வமா மலக்கத் ஐமானுக்கும்"
(தொழுகையைப் பேணுங்கள், தொழுகையைக் கவனித்துக் கொள்ளுங்கள்; உங்கள் கைகளின் கீழ் உள்ளவர்களை (பணியாளர்களை) கனிவோடு நடத்துங்கள்).
மரண வேதனையிலும் தன் சமுதாயம் இறைவணக்கத்தை விட்டுவிடக் கூடாது என்பதில் அவர்கள் காட்டிய அக்கறை இது.
நூல்: ஸுனன் அபூ தாவூத் (5156),
"உம்மத்தீ... உம்மத்தீ..." (என் சமுதாயமே!)
நபியவர்களின் இறுதி மூச்சு பிரியும் தருவாயில், அவர்கள் மிக மெல்லிய குரலில் முணுமுணுத்த வார்த்தை "உம்மத்தீ... உம்மத்தீ..." என்பதாகும்.
வஹீ (இறைச்செய்தி) கொண்டு வரும் வானவர் ஜிப்ரயீல் அலைஹிஸ்ஸலாம் அவர்கள் நபியவர்களிடம் வந்து விடைபெற்ற போது, நபியவர்கள் தன் உம்மத்தின் பாதுகாப்பு குறித்துக் கவலை தெரிவித்தார்கள். அப்போது அல்லாஹ், "உமது உம்மத் விஷயத்தில் உம்மை நாம் கவலையடையச் செய்ய மாட்டோம்" என்று மீண்டும் ஒருமுறை உறுதி அளித்தான்.
"உம்மத்திற்கு ஸலாம் சொல்லுங்கள்"
நபி ஸல்லல்லாஹு அலைஹி வஸல்லம் அவர்கள் மரணிப்பதற்குச் சற்று நேரத்திற்கு முன்பு, தன் தோழர்களை நோக்கி ஒரு நெகிழ்ச்சியான செய்தியைச் சொன்னார்கள்:
"எனக்குப் பின்னால் வரக்கூடிய, என்னை நேசிக்கக்கூடிய என் உம்மத்தினருக்கு எனது ஸலாத்தைக் கூறிவிடுங்கள்."
தன்னைக் காணாமலேயே தன்னை நேசிக்கப் போகும் பிற்காலச் சமுதாயத்தின் மீது அவர்கள் கொண்டிருந்த பேரன்பிற்கு இதுவே சான்று.
"ஹஸ்பியல்லாஹ்" (எனக்கு அல்லாஹ்வே போதும்)
129-வது வசனத்தில் உள்ள "ஃபாஇன் தவல்லவ்..." (அவர்கள் உம்மைப் புறக்கணித்துவிட்டால்) என்ற பகுதி மிக முக்கியமானது.
* ஒரு சத்தியத்தை எடுத்துச் சொல்லும்போது மக்கள் நம்மை விட்டு விலகிச் சென்றால், நாம் தனிமையாக உணரத் தேவையில்லை.
* "எனக்கு அல்லாஹ்வே போதுமானவன்" என்று சொல்லும்போது, ஒரு மனிதன் உலக சக்திகள் அனைத்தையும் விட இறைவனின் ஆற்றலைத் துணையாகக் கொள்கிறான்.
* தவக்குல் (நம்பிக்கை): "அவன் மீதே நான் பொறுப்புச் சாட்டினேன்" என்பது இக்கட்டான சூழலில் மனதிற்கு மிகப்பெரிய அமைதியையும் தைரியத்தையும் தருகிறது.
இப்ராஹீம் அலைஹிஸ்ஸலாம் அவர்கள் நெருப்பில் வீசப்பட்டபோது
இப்ராஹீம் அலைஹிஸ்ஸலாம் அவர்களை நமிர்ரூத் மன்னன் மிகப்பெரிய நெருப்புக் குண்டத்தில் வீசியபோது, அவர்கள் கூறிய வார்த்தை இதுதான்.
நெருப்பு கொழுந்துவிட்டு எரிந்து கொண்டிருந்தது. இப்ராஹீம் அலைஹிஸ்ஸலாம் அவர்கள் கைகள் கட்டப்பட்டு நெருப்பில் வீசப்படத் தயாராக இருந்தார்கள். அப்போது வானவர் ஜிப்ரயீல் அலைஹிஸ்ஸலாம் அவர்கள் தோன்றி, "இப்ராஹீமே! உமக்கு ஏதேனும் உதவி வேண்டுமா?" என்று கேட்டார்கள். அதற்கு இப்ராஹீம் அலைஹிஸ்ஸலாம் அவர்கள்:
"உம்மிடம் எனக்கு எந்த உதவியும் தேவையில்லை; எனக்கு அல்லாஹ்வே போதுமானவன். அவனே மிகச்சிறந்த பாதுகாவலன் (ஹஸ்புனல்லாஹு வநிஃமல் வகீல்)" என்று கூறினார்கள்.
விளைவு:
அவர்கள் இந்த வார்த்தையை முழுமையாக நம்பிச் சொன்னபோது, அல்லாஹ் நெருப்பைப் பார்த்து, "நெருப்பே! இப்ராஹீமின் மீது நீ குளிர்ச்சியாகவும், பாதுகாப்பாகவும் ஆகிவிடு!" என்று கட்டளையிட்டான். நெருப்பு அவர்களைச் சுடவில்லை.
ஆதாரம்: ஸஹீஹ் புகாரி (4563).
உஹுத் போர்க்களத்தில் நபி (ஸல்) மற்றும் தோழர்கள்
உஹுத் போருக்குப் பிறகு, எதிரிகள் மீண்டும் ஒரு தாக்குதலுக்குத் தயாராகிறார்கள் என்ற செய்தி வந்தபோது, முஸ்லிம்கள் பலவீனமாக இருந்தனர். அந்த நேரத்தில் இந்த வசனம் அருளப்பட்டது.
"மக்கள் (எதிரிகள்) உங்களுக்கெதிராகத் திரண்டு விட்டார்கள், எனவே அவர்களுக்கு அஞ்சுங்கள்" என்று சிலர் வந்து முஸ்லிம்களைப் பயமுறுத்தினார்கள். ஆனால், அந்த அச்சுறுத்தல் அவர்களின் ஈமானை (நம்பிக்கையை) அதிகப்படுத்தியது. அவர்கள் கூறினார்கள்:
"ஹஸ்புனல்லாஹு வநிஃமல் வகீல்" (எங்களுக்கு அல்லாஹ்வே போதுமானவன்; அவனே சிறந்த பாதுகாவலன்).
விளைவு:
இதன் காரணமாக அவர்களுக்கு எந்தத் தீங்கும் ஏற்படவில்லை; அல்லாஹ்வின் அருளோடும் அருட்கொடையோடும் அவர்கள் வெற்றியுடன் திரும்பினார்கள்.
அல்குர்ஆன் (3:173-174).
இந்த வார்த்தையின் மகத்துவம் (சிறப்புகள்)
நபி ஸல்லல்லாஹு அலைஹி வஸல்லம் அவர்கள் கூறியுள்ளார்கள்: "யார் காலையிலும் மாலையிலும் ஏழு முறை பின்வருமாறு கூறுகிறாரோ, அவருடைய உலக மற்றும் மறுமை கவலைகளுக்கு அல்லாஹ் போதுமானவனாகி விடுவான்":
حَسْبِيَ اللّٰهُ لَا إِلٰهَ إِلَّا هُوَ عَلَيْهِ تَوَكَّلْتُ وَهُوَ رَبُّ الْعَرْشِ الْعَظِيْمِ
(எனக்கு அல்லாஹ்வே போதுமானவன்; அவனைத் தவிர வேறு இறைவனில்லை; அவன் மீதே நான் முழு நம்பிக்கை வைத்துள்ளேன்; அவன் மகத்தான அரியாசனத்தின் (அர்ஷின்) அதிபதி).நூல்:அபூ தாவூத்
அர்ஷின் அதிபதி (ரப்புல் அர்ஷில் அளீம்)
அல்லாஹ் தன்னை "மகத்தான அரியாசனத்தின் (அர்ஷின்) அதிபதி" என்று குறிப்பிடுவதன் மூலம், "உன்னைப் புறக்கணிக்கும் இந்த மனிதர்கள் மிகச் சிறியவர்கள்; ஒட்டுமொத்தப் பிரபஞ்சத்தையே ஆளும் நான் உன்னோடு இருக்கிறேன்" என்ற மாபெரும் பாதுகாப்பை நபிகளாருக்கு உறுதிப்படுத்துகிறான்.
அர்ஷின் அதிபதி என்பது குறித்து நாம் பேசும்போது, அதன் பிரம்மாண்டத்தைப் புரியவைக்க ஒரு முக்கியமான வரலாற்றுச் சம்பவத்தைக் குறிப்பிடுவது அவசியம். இது அர்ஷின் அளவு மற்றும் அல்லாஹ்வின் வல்லமையை விளக்கும்.
வானவர் ஜிப்ரயீல் அலைஹிஸ்ஸலாம் அவர்கள் மற்றும் அர்ஷ் (சம்பவம்)
வானவர்களிலேயே மிகவும் வலிமையானவர் ஜிப்ரயீல் (அலை). அவருக்கு 600 இறக்கைகள் உள்ளன. ஒருமுறை நபி (ஸல்) அவர்களிடம் அவர் தனது உண்மையான உருவத்தில் காட்சியளித்தபோது, அவருடைய உடல் கிழக்கு திசைக்கும் மேற்கு திசைக்கும் இடைப்பட்ட அடிவானம் முழுவதையும் மறைத்திருந்தது. அத்தகைய பிரம்மாண்டமான படைப்பான ஜிப்ரயீல் அலைஹிஸ்ஸலாம் அவர்கள் அல்லாஹ்விடம் ஒருமுறை ஒரு கோரிக்கையை முன்வைத்தார்கள்:
"இறைவா! உன்னுடைய அர்ஷின் எல்லையை நான் பார்க்க விரும்புகிறேன். அதைச் சுற்றி வர எனக்கு அனுமதி கொடு."
அல்லாஹ் அவருக்கு அனுமதி அளித்தான். ஜிப்ரயீல் அலைஹிஸ்ஸலாம் அவர்கள் தனது 600 இறக்கைகளையும் விரித்துப் பறக்க ஆரம்பித்தார்கள். ஒவ்வொரு முறை இறக்கையை அடிக்கும்போதும் அவர்கள் பல ஆயிரம் மைல் தூரத்தைக் கடந்தார்கள். நீண்ட காலம் (ஆயிரக்கணக்கான ஆண்டுகள் என சில குறிப்புகள் கூறுகின்றன) இடைவிடாமல் பறந்து கொண்டே இருந்தார்கள்.
இறுதியாக ஒரு இடத்தில் களைத்துப் போய் நின்றார்கள். அங்கே ஒரு வானவர் அர்ஷைச் சுமந்து கொண்டிருப்பதைக் கண்டார்கள். அவரிடம் ஜிப்ரயீல் அலைஹிஸ்ஸலாம் கேட்டார்கள், "நான் அர்ஷின் எல்லையைக் காண எவ்வளவு தூரம் கடந்து வந்திருக்கிறேன்? இன்னும் எவ்வளவு தூரம் இருக்கிறது?"
அதற்கு அந்த வானவர் புன்னகைத்துவிட்டுச் சொன்னார்:
"ஜிப்ரயீலே! நீங்கள் எவ்வளவு தூரம் கடந்து வந்திருக்கிறீர்கள் என்று எனக்குத் தெரியாது. ஆனால், நீங்கள் பறக்க ஆரம்பித்த இடத்திலிருந்து இதுவரை கடந்த தூரத்தை விட, நீங்கள் இன்னும் கடக்க வேண்டிய தூரம் பல கோடி மடங்கு அதிகம். நான் சுமந்து கொண்டிருக்கும் இந்த அர்ஷின் ஒரு சிறிய தூணின் எல்லையைக் கூட உங்களால் இன்னும் நெருங்க முடியவில்லை!" நூல் தஃப்ஸீர் இப்னு கஸீர்
* ஒரு படைப்பான அர்ஷே இவ்வளவு பிரம்மாண்டமானது என்றால், அதைப் படைத்த அல்லாஹ் எவ்வளவு பெரியவனாக (அக்பர்) இருப்பான்!
*இவ்வளவு பெரிய அர்ஷை ஆளும் அல்லாஹ், ஒரு சாதாரண மனிதனின் சிறு கவலையை (9:129 வசனத்தில் கூறியது போல) தீர்க்கப் போதுமானவன்.
* "ரப்புல் அர்ஷில் அழீம்" என்று நாம் சொல்லும்போது, பிரபஞ்சத்தின் மிகப்பெரிய சக்தியை நாம் துணையாக அழைக்கிறோம் என்ற தைரியம் நமக்குள் வரவேண்டும்.
வாழ்வியல் பயன்கள் (Benefits)
பெரியோர்கள் மற்றும் அறிஞர்கள் இந்த வசனங்களை ஓதுவதால் கிடைக்கும்
* மன அழுத்தம் நீங்குதல்: கவலைகள் சூழும் போது "ஹஸ்பியல்லாஹ்..." வசனத்தை ஓதுவது மனதிற்கு நிம்மதி தரும்.
* எதிரிகளின் சூழ்ச்சிகளிலிருந்தும், தேவையற்ற பயங்களிலிருந்தும் அல்லாஹ் இதைக் கொண்டு பாதுகாக்கிறான்.
அவற்றில் மிக முக்கியமானவை :-
1. கவலைகள் நீங்கி மன அமைதி பெறுதல்
வாழ்க்கையில் தீர்க்க முடியாத பிரச்சனைகள், கடன் தொல்லை அல்லது மன அழுத்தம் ஏற்படும்போது இந்த வசனங்களை ஓதுவது பெரிய நிம்மதியைத் தரும்.
* பயன்: "அல்லாஹ் எனக்குப் போதுமானவன்" என்ற உறுதி பிறப்பதால், தேவையற்ற பயம் மற்றும் கவலைகள் உள்ளத்திலிருந்து நீங்கும்.
2. திடீர் மரணத்திலிருந்து பாதுகாப்பு
சில அறிஞர்கள் மற்றும் பெரியோர்களின் கூற்றுப்படி, எவர் காலையில் இந்த இரு வசனங்களை ஓதுகிறாரோ, அன்றைய தினம் அவர் விபத்து அல்லது திடீர் மரணத்திலிருந்து பாதுகாக்கப்படுகிறார்.
குறிப்பு: அன்றைய தினம் அவருக்கு மரணம் விதியக்கப்பட்டிருந்தால், அவரால் இந்த வசனங்களை ஓத முடியாமல் போய்விடும் அல்லது ஓத மறந்துவிடுவார் என்றும் சில குறிப்புகள் கூறுகின்றன.
3.நபி ஸல்லல்லாஹு அலைஹி வஸல்லம் அவர்கள் கூறினார்கள்:
"எவர் காலையிலும் மாலையிலும் ஏழு முறை 'ஹஸ்பியல்லாஹு லா இலாஹ இல்லா ஹுவ அலைஹி தவக்கல்து வஹுவ ரப்புல் அர்ஷில் அழீம்' என்று ஓதுகிறாரோ, அவருடைய உலக மற்றும் மறுமை தொடர்பான கவலைகளுக்கு அல்லாஹ் போதுமானவனாகி விடுவான்."
* நூல்: ஸுனன் அபூ தாவூத் (5081).
4. மக்களின் அன்பைப் பெறுதல்
128-வது வசனம் நபிகளாரின் கருணையைப் பற்றிப் பேசுகிறது. இந்த வசனத்தைத் தொடர்ந்து ஓதி வருபவர்களுக்கு மக்கள் மத்தியில் கண்ணியமும், பிறரின் அன்பும் கிடைக்கும் என்று ஆன்மீக அறிஞர்கள் குறிப்பிடுகின்றனர்.
5. எதிரிகளின் சூழ்ச்சிகளிலிருந்து பாதுகாப்பு
"ஃபஇன் தவல்லவ்..." (அவர்கள் உம்மைப் புறக்கணித்துவிட்டால்...) என்று தொடங்கும் 129-வது வசனம், எதிரிகள் நமக்கு எதிராகச் சதி செய்யும்போதும், மக்கள் நம்மைத் தனிமைப்படுத்தும் போதும் ஒரு கவசமாகச் செயல்படுகிறது. நம்மை வீழ்த்த நினைப்பவர்களுக்கு எதிராக இறைவனின் உதவி இதன் மூலம் கிடைக்கும்.
6. காரியங்களில் வெற்றி (தவக்குல்)
புதிதாக ஒரு வேலையைத் தொடங்கும்போதோ அல்லது ஒரு முக்கியமான முடிவை எடுக்கும்போதோ இந்த வசனங்களை ஓதினால், அல்லாஹ் அந்தப் பொறுப்பை ஏற்றுக்கொள்வான். "அவன் மீதே நான் பொறுப்புச் சாட்டினேன்" (அலைஹி தவக்கல்து) என்ற வார்த்தை காரியங்களை எளிதாக்கும்.
நமது கஷ்டங்கள் நபி ஸல்லல்லாஹு அலைஹி வஸல்லம் அவர்களை வருத்தமடையச் செய்கின்றன.
நாம் நேர்வழி பெற்று, இம்மையிலும் மறுமையிலும் வெற்றி பெற வேண்டும் என்பதில் நபி ஸல்லல்லாஹு அலைஹி வஸல்லம் அவர்கள் மிகுந்த ஆர்வம் கொண்டிருந்தார்கள்.
முஃமின்கள் மீது நபி ஸல்லல்லாஹு அலைஹி வஸல்லம் அவர்கள் காட்டிய இரக்கமும் கிருபையும் ஈடு இணையற்றது.
இந்த உயரிய பண்புகளை நாமும் நம் வாழ்வில் பிரதிபலிக்கச் செய்வதே அந்தத் தூதருக்கு நாம் செய்யும் உண்மையான மரியாதையாகும்.
யா அல்லாஹ்! உன்னுடைய தூதர் எங்கள் மீது காட்டிய அதே அன்பையும், அக்கறையையும் எங்களுக்கும் அவர்கள் மீது வழங்கியருள்வாயாக.
யா ரஹ்மானே! நபிகள் நாயகம் (ஸல்) அவர்கள் காட்டிய நேர்வழியில் எங்களை நிலைத்திருக்கச் செய்வாயாக. அவர்களின் அழகிய பண்புகளை எங்களுடைய குணநலன்களாக மாற்றுவாயாக.
எல்லாம் வல்ல இறைவனே! மறுமை நாளில் உன்னுடைய தூதரின் பரிந்துரையை (ஷஃபாஅத்) எங்களுக்கு நசீபாக்கி வைப்பாயாக. அவர்களை ஜன்னத்துல் ஃபிர்தவ்ஸில் சந்திக்கும் பாக்கியத்தை எங்களுக்கும், எங்கள் குடும்பத்தாருக்கும் தந்தருள்வாயாக. ஆமீன்!
தொகுத்தவர்.
மவ்லவி B.முஹம்மது ராஃபி ரஷீதி.
தலைமை இமாம். மஸ்ஜிதே முபாரக் கிருஷ்ணாம்பேட்டை அரக்கோணம்.
Cell : +91 90949 86824.
முந்தைய பதிவுகள் வாசிக்க 👇 கிளிக் செய்யவும்.
கருத்துகள் இல்லை:
கருத்துரையிடுக