ஹலால் ஹராம் பேணுவோம் இறைநேசர் ஆகுவோம்

 

ஹலால் ஹராம் பேணுவோம் இறைநேசர் ஆகுவோம்

يَا أَيُّهَا الرُّسُلُ كُلُوا مِنَ الطَّيِّبَاتِ وَاعْمَلُوا صَالِحًا ۖ إِنِّي بِمَا تَعْمَلُونَ عَلِيمٌ

மனிதனின் ஈருலக வாழ்வையும் தீர்மானிக்கக்கூடிய மிக முக்கியமான அடித்தளம்: "ஹலாலும் ஹராமும்" (அனுமதிக்கப்பட்டதும், தடுக்கப்பட்டதும்).

நபி ﷺ அவர்கள் கூறினார்கள்:

"ஹலால் என்பதும் தெளிவாகிவிட்டது; ஹராம் என்பதும் தெளிவாகிவிட்டது. இவ்விரண்டிற்கும் இடையில் பல சந்தேகத்திற்குரிய காரியங்களும் இருக்கின்றன. அவற்றை மனிதர்களில் பெரும்பாலானவர்கள் அறிந்துகொள்வதில்லை..." (ஸஹீஹ் புகாரி)

ஹலால்: அல்லாஹ் மற்றும் அவனது தூதர் ﷺ அவர்களால் மனித சமுதாயத்திற்கு அனுமதிக்கப்பட்ட, நன்மை பயக்கக்கூடிய, தூய்மையான காரியங்கள்.

ஹராம்: மனித வாழ்விற்குத் தீங்கு விளைவிக்கக்கூடிய, விபரீதத்தை ஏற்படுத்தக்கூடிய, மார்க்கத்தால் திட்டவட்டமாகத் தடை செய்யப்பட்ட காரியங்கள்.

ஹலால்–ஹராம் என்பது வெறும் உணவுப் பழக்கத்தோடு மட்டும் சுருங்கிவிடுவதில்லை:

நாம் உண்ணும் உணவு மற்றும் பருகும் திரவங்கள்

நாம் ஈட்டும் வருமானம் மற்றும் தொழில் முறைகள்

நாம் பிறருடன் கொள்ளும் வணிக, சமூகத் தொடர்புகள்

நமது கண், காது, நாவால் செய்யும் செயல்கள்

என வாழ்வின் ஒவ்வொரு அங்கத்திலும் இந்த எல்லைக் கோடு இருக்கிறது.

ஹலாலான வழியில் வாழ்வது நமது உடலையும் உள்ளத்தையும் பரிசுத்தமாக்குகிறது; நமது துஆக்களை (பிரார்த்தனைகளை) கபூல் செய்ய வைக்கிறது. மாறாக, ஹராமான உணவும் வருமானமும் வணக்க வழிபாடுகளின் பலனை அழித்துவிடுகின்றன.

உலகிலுள்ள அனைத்துப் பொருட்களும் மனிதனின் பயன்பாட்டிற்காகவே படைக்கப்பட்டுள்ளன. குர்ஆன் மற்றும் ஸுன்னாவில் திட்டவட்டமாகத் தடை செய்யப்படாத வரை அனைத்துமே அடிப்படையில் அனுமதிக்கப்பட்டவை (ஹலால்) ஆகும்.

ஹராமாக்கப்படுவதன் காரணம்: மனிதனின் உடல், உள்ளம், அறிவு, ஆன்மா அல்லது சமூக அமைதிக்குத் தீமை விளைவிக்கக்கூடிய காரியங்களை மட்டுமே இறைவன் தடுத்துள்ளான். நன்மையானவற்றை ஹலாலாக்கி, தீங்கானவற்றை ஹராமாக்குவதே இறைவழிகாட்டலின் நோக்கம்.

ஹராமான உணவும் அங்கீகரிக்கப்படாத துஆவும்

நபி ﷺ அவர்கள் ஒரு மனிதனைப் பற்றி குறிப்பிட்டார்கள்:

"நீண்ட தூரம் பிரயாணம் செய்து, தலைமுடி கலைந்து, புழுதி படிந்த நிலையில் இரு கைகளையும் வானை நோக்கி உயர்த்தி 'யா ரப்! யா ரப்!' என்று துஆ கேட்கிறான். ஆனால் அவனது உணவோ ஹராம், அவனது பானமோ ஹராம், அவனது ஆடையும் ஹராம், அவன் வளர்க்கப்பட்டதும் ஹராமான உணவில். அத்தகையவனின் துஆ எவ்வாறு அங்கீகரிக்கப்படும்?" (ஸஹீஹ் முஸ்லிம்)

வாழ்க்கையை உயர்த்தும் 5 நற்பண்புகள்

مَنْ يَأْخُذُ عَنِّي هَؤُلاَءِ الْكَلِمَاتِ فَيَعْمَلُ بِهِنَّ أَوْ يُعَلِّمُ مَنْ يَعْمَلُ بِهِنَّ؟ فَقُلْتُ: أَنَا يَا رَسُولَ اللَّهِ، فَأَخَذَ بِيَدِي فَعَدَّ خَمْسًا وَقَالَ: «اتَّقِ الْمَحَارِمَ تَكُنْ أَعْبَدَ النَّاسِ، وَارْضَ بِمَا قَسَمَ اللَّهُ لَكَ تَكُنْ أَغْنَى النَّاسِ، وَأَحْسِنْ إِلَى جَارِكَ تَكُنْ مُؤْمِنًا، وَأَحِبَّ لِلنَّاسِ مَا تُحِبُّ لِنَفْسِكَ تَكُنْ مُسْلِمًا، وَلاَ تُكْثِرِ الضَّحِكَ فَإِنَّ كَثْرَةَ الضَّحِكِ تُمِيتُ الْقَلْبَ»

அபூஹுரைரா (ரழியல்லாஹு அன்ஹு) அவர்கள் அறிவிக்கிறார்கள்:

அல்லாஹ்வின் தூதர் ﷺ அவர்கள் ஒருமுறை எங்களிடம், "இவ்வார்த்தைகளை என்னிடமிருந்து பெற்று, அதன்படி அமல் செய்பவர் யார்? அல்லது அதன்படி அமல் செய்பவருக்குக் கற்றுக் கொடுப்பவர் யார்?" என்று கேட்டார்கள்.

அதற்கு நான், "அல்லாஹ்வின் தூதரே! நான் (அதற்குத் தயார்)" என்று கூறினேன். உடனே நபியவர்கள் எனது கையைப் பிடித்துக் கொண்டு, பின்வரும் ஐந்து விஷயங்களை விரல்விட்டு எண்ணிக் கூறினார்கள்:

"அல்லாஹ் தடுத்த (ஹராமான) காரியங்களை விட்டும் தவிர்ந்து கொள்ளுங்கள்; நீர் மனிதர்களிலேயே மிகச் சிறந்த வணக்கவாளியாக (ஆபித்தாக) ஆகிவிடுவீர்!

அல்லாஹ் உங்களுக்குப் பங்கிட்டுக் கொடுத்த (வாழ்வாதாரத்)தைக் கொண்டு மனதிருப்தி அடையுங்கள்; நீர் மனிதர்களிலேயே பெரும் பணக்காரராக ஆகிவிடுவீர்!

உமது அண்டை வீட்டாருக்கு உபகாரம் (நன்மை) செய்யுங்கள்; நீர் உண்மையான முஃமினாக (நம்பிக்கையாளராக) ஆகிவிடுவீர்!

உங்களுக்கு எதை விரும்புகிறீர்களோ அதையே மற்ற மனிதர்களுக்கும் விரும்புங்கள்; நீர் உண்மையான முஸ்லிமாக ஆகிவிடுவீர்!

அதிகமாகச் சிரிப்பதைத் தவிர்த்துக்கொள்ளுங்கள்; ஏனெனில் நிச்சயமாக அதிகச் சிரிப்பு உள்ளத்தை இறக்கச் செய்துவிடும் (உள்ளத்தின் உயிரோட்டத்தை அழித்துவிடும்)."

(நூல்: ஜாமிஉத் திர்மிதீ)

ஒரு ஆப்பிள் பழத்தை உண்டதற்காக…

இளைஞர் அபூ ஸாலிஹ் மூஸா (ரஹ்மத்துல்லாஹி அலைஹி) அவர்கள் இளம் வயதிலேயே மிகுந்த இறையச்சமும் தூய்மையான ஒழுக்கமும் கொண்ட ஒரு வாலிபராகத் திகழ்ந்தார்கள்.

ஒரு நாள், அவர்கள் கிலானில் உள்ள ஓர் ஆற்றின் கரையில் அமர்ந்து திக்ர் செய்து கொண்டும், உளூச் செய்து கொண்டும் இருந்தார்கள். அப்போது கடுமையான பசி அவர்களை வாட்டியது. அந்த நேரத்தில், ஆற்று நீரில் ஒரு சுவையான ஆப்பிள் பழம் மிதந்து வருவதைக் கண்டார்கள்.

கடும் பசியின் உந்துதலால், யோசிக்காமல் அந்த ஆப்பிளைக் கையில் எடுத்து, அதன் ஒரு பாதியை உண்டுவிட்டார்கள். பாதி ஆப்பிளை விழுங்கிய உடனேயே அவர்களின் உள்ளுணர்வு விழித்துக் கொண்டது:

"சுப்ஹானல்லாஹ்! இந்த ஆப்பிள் யாருடையதோ? இதன் உரிமையாளரின் அனுமதி இல்லாமல் நான் எப்படி இதை உண்டேன்? பிறர் உரிமையில் அனுமதியின்றி கைவைப்பது ஹராம் அல்லவா? அல்லாஹ்விடம் இதற்கு நான் என்ன பதில் சொல்வேன்?"

அவர்களின் கண்கள் கண்ணீரால் நிரம்பின. உடனே, அந்த ஆப்பிளின் உரிமையாளரைக் கண்டு அவரிடம் மன்னிப்புப் பெற்றாக வேண்டும் என்று முடிவெடுத்தார்கள். மீதி இருந்த அரை ஆப்பிளைத் தன் கையில் எடுத்துக்கொண்டு, அந்த ஆப்பிள் மிதந்து வந்த திசையை நோக்கி பல மைல் தூரம் நடைபயணம் மேற்கொண்டார்கள்.

நீண்ட தூரப் பயணத்திற்குப் பிறகு, ஆற்றின் கரையோரமாக இருந்த ஒரு பெரிய பழத்தோட்டத்தைக் கண்டார்கள். விசாரித்ததில், அந்தத் தோட்டம் அப்பகுதியின் தலைசிறந்த பெரியாருமான ஹஜ்ரத் அப்துல்லாஹ் அஸ்-ஸவ்மயீ (ரஹ்) அவர்களுக்குச் சொந்தமானது என்பது தெரியவந்தது.

அபூ ஸாலிஹ் (ரஹ்) அவர்கள் பணிவுடன் அவர்களின் இல்லத்தை அடைந்து, நடந்த சம்பவத்தைக் கூறி, மீதமிருந்த அரை ஆப்பிளைக் கொடுத்து மன்னிப்பு வேண்டினார்கள். பெரியார் அந்த இளைஞனின் பொறுமையையும் தூய்மையையும் சோதிக்க எண்ணி, "நான் உன்னை மன்னிக்க வேண்டுமென்றால், நீ என் தோட்டத்தில் ஓராண்டு (சில அறிவிப்புகளில் 8 ஆண்டுகள்) கூலி வேலை செய்ய வேண்டும்!" என்றார்.

இறைவனின் தண்டனைக்கு அஞ்சிய அந்த வாலிபர் அதற்குச் சம்மதித்து உழைத்தார். காலம் முடிந்ததும் மீண்டும் மன்னிப்புக் கேட்டபோது பெரியார் கூறினார்: "இன்னும் ஒரு நிபந்தனை மீதமிருக்கிறது. எனக்கு ஒரு மகள் இருக்கிறாள். அவளுக்குக் கண்கள் தெரியாது, காதுகள் கேட்காது, நாவால் பேச முடியாது, கால்களால் நடக்க முடியாது. அவளை நீ திருமணம் செய்துகொள்ள வேண்டும்!"

மறுமையின் நரக நெருப்பை விட இது மேல் என எண்ணி அதற்கும் சம்மதித்தார். திருமணம் முடிந்து மணவறைக்குள் அடியெடுத்து வைத்த அபூ ஸாலிஹ் அவர்கள் அதிர்ச்சியில் உறைந்துபோனார்கள்! அங்கே அழகிலும் நற்குணத்திலும் சிறந்த ஒரு பெண் அமர்ந்திருந்து இனிமையாக ஸலாம் கூறினார்.

குழப்பமடைந்த அபூ ஸாலிஹ் அவர்களிடம் மாமனார் புன்னகையுடன் விளக்கினார்:

"என் மகள் பாத்திமா ஊனமுற்றவள் அல்ல! அவள் பார்வையற்றவள் — இதுவரை எந்த ஓர் அந்நிய ஆணையும் ஹராமான காட்சியையும் பார்த்ததில்லை! அவள் செவிடானவள் — வீணான எந்தப் பேச்சையும் செவியுற்றதில்லை! அவள் ஊமையானவள் — தன் நாவால் பாவங்களைப் பேசியதில்லை! அவள் முடமானவள் — தவறான இடத்திற்கு நடந்ததில்லை! இவ்வளவு பரிசுத்தமான என் மகளுக்கு, ஆற்றில் மிதந்துவந்த அரை ஆப்பிளையும் ஹராம் எனப் பயந்து நடுங்கிய உங்களைப் போன்ற ஒரு பரிசுத்தமான வாலிபரைத் தவிர வேறு எவரை நான் கணவனாகத் தேர்ந்தெடுக்க முடியும்?"

இத்தகைய அதிதூய்மையான தந்தைக்கும், புனிதம் நிறைந்த தாயாருக்கும் பிறந்த தவப்புதல்வர்தான் அகிலத்திற்கே வழிகாட்டியான சுல்தானுல் அவ்லியா முஹ்யித்தீன் அப்துல் காதிர் ஜீலானி (ரலியல்லாஹு அன்ஹு) அவர்கள்!

இமாம் ஜுனைதுல் பக்தாதி (ரஹ்) அவர்களின் படிப்பினை

ஒரு நாள் இமாம் ஜுனைதுல் பக்தாதி (ரஹ்) அவர்கள் ஒரு ஜனாஸா நல்லடக்கத்தில் கலந்துகொள்வதற்காகக் காத்திருந்தார்கள். அங்கே ஒரு திடகாத்திரமான யாசகர் கையேந்தி யாசகம் கேட்டுக்கொண்டிருந்தார். அவரைப் பார்த்த இமாம் அவர்களின் மனதில் ஓர் எண்ணம் தோன்றியது:

لَوْ عَمِلَ هَذَا الرَّجُلُ بِيَدِهِ فَأَكَلَ مِنْ كَسْبِهِ، وَصَانَ نَفْسَهُ عَنِ السُّؤَالِ، لَكَانَ خَيْرًا لَهُ

"இவ்வளவு நல்ல உடலமைப்பு கொண்ட இவர், யாசகம் கேட்காமல் உழைத்துச் சம்பாதித்துத் தன் மானத்தைக் காத்துக் கொள்ளலாமே!" — இந்த எண்ணத்தை இமாமவர்கள் நாவினால் சொல்லவில்லை; உள்ளத்திற்குள் மட்டுமே வந்தது.

அன்றிரவு இமாம் கனவில் ஒரு காட்சியைக்கண்டார்கள். வானவர்கள் ஒரு பெரிய தட்டில் அந்த யாசகரின் சடலத்தைக் கொண்டுவந்து வைத்து, "இதை நீர் உண்ணுங்கள்!" என்றனர்.

فَإِذَا بِخِوَانٍ عَلَيْهِ هَذَا الشَّابُّ مَيْتًا، فَقِيلَ لِي: كُلْ مِنْ لَحْمِهِ! فَقُلْتُ: سُبْحَانَ اللَّهِ! آكُلُ لَحْمَ آدَمِيٍّ؟ وَمَا اغْتَبْتُهُ، وَلَا تَكَلَّمْتُ فِيهِ بِشَيْءٍ!

இமாம் திடுக்கிட்டு, "நான் யாருடைய புறத்தையும் பேசவில்லையே!" என்றார்கள். வானவர்கள் கூறினார்கள்: "நீர் நாவினால் பேசவில்லை; ஆனால் உமது உள்ளத்திற்குள் அவரைப் பற்றித் தவறாக எடைபோட்டு விட்டீர் (ஸூஉள்ளன்). உமது அந்த எண்ணம் புறத்திற்குச் (கீபத்திற்குச்) சமமாகிவிட்டது!"

மறுநாள் இமாம் அந்த யாசகரைத் தேடி அலைந்தார். அவர் ஒரு நதிக்கரையில், எறியப்பட்ட அழுகிய காய்கறி இலைகளைக் கழுவிச் சாப்பிட்டுக் கொண்டிருந்தார்! அவர் பிறரிடம் யாசகம் கேட்டது பசியின் உச்சக்கட்டத்தினால்தான் என்பதை இமாம் உணர்ந்தார்.

فَلَمَّا رَآنِي تَبَسَّمَ وَقَالَ: يَا أَبَا الْقَاسِمِ! أَكَفَاكَ مَا جَرَى الْبَارِحَةَ؟ أَمَا عَلِمْتَ أَنَّكَ لَا تُسِيءُ الظَّنَّ بِعِبَادِ اللَّهِ تَعَالَى؟

அந்த மனிதர் இமாமைப் பார்த்து, "அபுல் காஸிமே! நேற்றிரவு நடந்தது போதுமா? இனிமேல் இறைவனின் அடியார்களைப் பற்றி உங்கள் உள்ளத்தில் கூட தவறாக எண்ண மாட்டீர்கள் அல்லவா?" என்று கேட்டு மன்னித்துவிட்டார். (நூல்: இஹ்யா உலூமித்தீன்)

இதிலிருந்து நாம் பெறும் படிப்பினைகள்:

உள்ளத்தின் புறம் (கீபத்துல் கல்ப்): ஆதாரமில்லாமல் உள்ளத்தால் ஒருவரைத் தவறாக எடைபோடுவதும் பாவமாகும்.

வெளித்தோற்றத்தை வைத்து எடைபோடக் கூடாது: பிச்சைக்காரர் போல காட்சியளிப்பவர்கள் கூட இறைவனிடத்தில் உயர்ந்த அந்தஸ்தில் இருக்கலாம்.

பணிவு (தவாழுஃ): தவறை உணர்ந்தவுடன் ஒரு சாதாரண மனிதரிடம் சென்றும் மன்னிப்புக் கேட்கத் தயங்கக்கூடாது.

கப்பல் பயணமும் இமாம் புகாரி (ரஹ்) அவர்களின் நாணயமும்

இமாம் புகாரி (ரஹ்) அவர்கள் ஹதீஸ்களைத் தேடி கடல் வழிப் பிரயாணம் மேற்கொண்டபோது, அவர்களிடம் 1000 தங்கக் காசுகள் (தீனார்) இருந்தன. கப்பலில் பழகிய ஒரு நயவஞ்சகனிடம் இதை இமாம் கூறிவிட்டார். மறுநாள் அந்த நயவஞ்சகன் தன் பணப்பை திருடுபோய்விட்டதாகக் கதறினான்.

கப்பல் மாலுமிகள் அனைவரையும் சோதனையிடத் தொடங்கினர். சோதனை அதிகாரிகள் இமாமை நெருங்குவதற்குள், தனக்கு திருடன் என்ற பழி வந்துவிடக் கூடாது என்பதற்காகவும், தான் சேகரித்த ஹதீஸ்களின் நம்பகத்தன்மை பாழாகிவிடக் கூடாது என்பதற்காகவும், யாருக்கும் தெரியாமல் அந்த 1000 தங்கக் காசுகளையும் நடுக்கடலில் வீசி எறிந்தார்கள்!

சோதனையில் எதுவும் கிடைக்காததால் அந்த நயவஞ்சகன் பொய்யன் என விரட்டப்பட்டான். பிறகு அவன் இமாமிடம், "ஏன் அவ்வளவு பெரிய தொகையைக் கடலில் வீசினீர்?" எனக் கேட்டபோது இமாம் கூறிய பதில்:

يَا جَاهِلُ! أَتَدْرِي أَنِّي أَفْنَيْتُ عُمُرِي كُلَّهُ فِي جَمْعِ حَدِيثِ رَسُولِ اللَّهِ ﷺ، وَعَرَفَ النَّاسُ كُلُّهُمْ صِدْقِي وَأَمَانَتِي، فَكَيْفَ أُضَيِّعُ هَذِهِ النِّعْمَةَ الَّتِي أَنْعَمَ اللَّهُ بِهَا عَلَيَّ، وَأَجْعَلُ نَفْسِي مَحَلَّ تُهْمَةٍ بِالسَّرِقَةِ فِي بَضْعَةِ دَنَانِيرَ؟

"அறிவீனனே! எனது வாழ்நாள் முழுவதையும் அல்லாஹ்வின் தூதர் ﷺ அவர்களின் ஹதீஸ்களைச் சேகரிப்பதிலேயே கழித்துள்ளேன். மக்கள் அனைவரும் எனது நம்பகத்தன்மையை அங்கீகரித்துள்ளனர். சில தீனார்களுக்காக 'திருடன்' என்ற சந்தேகப் பழிக்கு என்னை ஆளாக்கி, என் வாழ்நாள் உழைப்பை இழந்துவிடுவேனா?"

பாடம்: பொருளை விடத் தன்மானமும், நம்பகத்தன்மையும் மேலானது!

ஹராம் தெளிவு... ஹலால் தெளிவு...

إِنَّ الْحَلَالَ بَيِّنٌ، وَإِنَّ الْحَرَامَ بَيِّنٌ، وَبَيْنَهُمَا أُمُورٌ مُشْتَبِهَاتٌ، لَا يَعْلَمُهُنَّ كَثِيرٌ مِنَ النَّاسِ، فَمَنِ اتَّقَى الشُّبُهَاتِ اسْتَبْرَأَ لِدِينِهِ وَعِرْضِهِ، وَمَنْ وَقَعَ فِي الشُّبُهَاتِ وَقَعَ فِي الْحَرَامِ، كَالرَّاعِي يَرْعَى حَوْلَ الْحِمَى، يُوشِكُ أَنْ يَرْتَعَ فِيهِ، أَلَا وَإِنَّ لِكُلِّ مَلِكٍ حِمًى، أَلَا وَإِنَّ حِمَى اللَّهِ مَحَارِمُهُ، أَلَا وَإِنَّ فِي الْجَسَدِ مُضْغَةً، إِذَا صَلَحَتْ صَلَحَ الْجَسَدُ كُلُّهُ، وَإِذَا فَسَدَتْ فَسَدَ الْجَسَدُ كُلُّهُ، أَلَا وَهِيَ الْقَلْبُ

"நிச்சயமாக ஹலாலானதும் தெளிவானது; நிச்சயமாக ஹராமானதும் தெளிவானது. அவ்விரண்டிற்கும் மத்தியில் சந்தேகத்திற்குரிய சில காரியங்கள் உள்ளன; அவற்றை மனிதர்களில் பெரும்பாலானவர்கள் அறியமாட்டார்கள்.

எனவே, எவர் சந்தேகத்திற்குரியவற்றிலிருந்து தன்னைத் தற்காத்துக் கொள்கிறாரோ, அவர் தனது மார்க்கத்தையும் தனது மானத்தையும் தூய்மையாகப் பாதுகாத்துக் கொண்டார். எவர் சந்தேகத்திற்குரியவற்றில் வீழ்கிறாரோ, அவர் ஹராமானதிலேயே வீழ்ந்துவிடுகிறார்.

அறிந்துகொள்ளுங்கள்! உடலில் ஒரு சதைத்துண்டு இருக்கிறது; அது சீராகிவிட்டால் உடல் முழுவதும் சீராகிவிடும். அது பாழாகிவிட்டால் உடல் முழுவதும் பாழாகிவிடும். எச்சரிக்கை! அதுதான் உள்ளம் (இதயம்) ஆகும்." (நூல்: புகாரி)

துஆ கபூல் ஆகனுமா?

عَنِ ابْنِ عَبَّاسٍ رَضِيَ اللَّهُ عَنْهُمَا قَالَ: تُلِيَتْ عِنْدَ رَسُولِ اللَّهِ ﷺ هَذِهِ الْآيَةُ: ﴿يَا أَيُّهَا النَّاسُ كُلُوا مِمَّا فِي الْأَرْضِ حَلَالًا طَيِّبًا﴾، فَقَامَ سَعْدُ بْنُ أَبِي وَقَّاصٍ، فَقَالَ: يَا رَسُولَ اللَّهِ، ادْعُ اللَّهَ أَنْ يَجْعَلَنِي مُسْتَجَابَ الدَّعْوَةِ، فَقَالَ لَهُ النَّبِيُّ ﷺ: "يَا سَعْدُ، أَطِبْ مَطْعَمَكَ تَكُنْ مُسْتَجَابَ الدَّعْوَةِ..."

ஸஃது இப்னு அபீ வக்காஸ் (ரழி) அவர்கள், "நான் கேட்கும் துஆக்கள் உடனுக்குடன் ஏற்றுக்கொள்ளப்படுபவனாக என்னை ஆக்கிவைக்க அல்லாஹ்விடம் பிரார்த்தனை செய்யுங்கள்" என்று வேண்டியபோது,

நபி ﷺ அவர்கள் கூறினார்கள்: "ஸஃதே! உமது உணவைத் தூய்மையானதாக (ஹலாலானதாக) ஆக்கிக் கொள்வீராக; நீர் துஆ ஏற்றுக்கொள்ளப்படுபவராக ஆகிவிடுவீர்! ஓர் அடியான் தனது வயிற்றுக்குள் ஹராமான ஒரு கவளம் உணவைப் போட்டால், அவனிடமிருந்து நாற்பது நாட்களின் நற்செயல்கள் ஏற்றுக்கொள்ளப்படுவதில்லை." (நூல்: அல்-முஃஜமுல் அவ்ஸத்)

ஜனாஸா தொழுகையும் விருந்து அழைப்பும்

عَنْ عَاصِمِ بْنِ كُلَيْبٍ، عَنْ أَبِيهِ، عَنْ رَجُلٍ مِنَ الأَنْصَارِ... فَقَالَ رَسُولُ اللَّهِ ﷺ: «إِنِّي أَجِدُ لَحْمَ شَاةٍ أُخِذَتْ بِغَيْرِ إِذْنِ أَهْلِهَا» ... فَقَالَ رَسُولُ اللَّهِ ﷺ: «أَطْعِمُوهُ الأُسَارَى»

ஒரு விருந்தில் பரிமாறப்பட்ட ஆட்டின் இறைச்சியை நபி ﷺ அவர்கள் வாயில் வைத்தபோது அதை மென்றுகொண்டே இருந்தார்களே தவிர விழுங்க முடியவில்லை. அது உரிமையாளரின் முழுமையான அனுமதியின்றி பெறப்பட்ட ஆடு என்பதை அறிந்து, அதைத் துப்பிவிட்டு "இந்த உணவைக் கைதிகளுக்கு உணவாகக் கொடுத்துவிடுங்கள்!" என உத்தரவிட்டார்கள். (நூல்: அபூதாவூத்)

சந்தேகத்திற்குரிய பேரீச்சம்பழம்

عَنْ أَبِي هُرَيْرَةَ رَضِيَ اللَّهُ عَنْهُ، عَنِ النَّبِيِّ ﷺ قَالَ: «إِنِّي لَأَنْقَلِبُ إِلَى أَهْلِي، فَأَجِدُ التَّمْرَةَ سَاقِطَةً عَلَى فِرَاشِي، فَأَرْفَعُهَا لِآكُلَهَا، ثُمَّ أَخْشَى أَنْ تَكُونَ صَدَقَةً، فَأُلْقِيهَا»

நபி ﷺ அவர்கள் வீட்டில் கீழே கிடந்த ஒரு பேரீச்சம்பழத்தை உண்ண முற்பட்டபோது, "இது தர்மத்திற்கு (ஸதகா) வந்ததாக இருக்குமோ" என்ற ஒரு சிறிய சந்தேகம் வந்தவுடன் அதைத் தவிர்த்துவிட்டார்கள். (ஸஹீஹ் புகாரி)

சந்தேகமானதை விட்டுவிடுங்கள்

عَنِ الْحَسَنِ بْنِ عَلِيٍّ رَضِيَ اللَّهُ عَنْهُمَا قَالَ: حَفِظْتُ مِنْ رَسُولِ اللَّهِ ﷺ: «دَعْ مَا يَرِيبُكَ إِلَى مَا لَا يَرِيبُكَ، فَإِنَّ الصِّدْقَ طُمَأْنِينَةٌ، وَإِنَّ الْكَذِبَ رِيبَةٌ»

"உமக்கு எதில் சந்தேகம் ஏற்படுகிறதோ அதை விட்டுவிட்டு, எதில் சந்தேகம் இல்லையோ அதை நோக்கிச் சென்றுவிடுவீராக! ஏனெனில் நிச்சயமாக உண்மை என்பது உள்ளத்திற்கு அமைதியளிக்கும்; பொய் என்பது சந்தேகத்தையும் குழப்பத்தையும் ஏற்படுத்தும்." (ஜாமிஉத் திர்மிதி)

குழந்தைகளுக்கு ஹராமைத் தடுத்தல்

عَنْ أَبِي هُرَيْرَةَ رَضِيَ اللَّهُ عَنْهُ، قَالَ: أَخَذَ الْحَسَنُ بْنُ عَلِيٍّ رَضِيَ اللَّهُ عَنْهُمَا تَمْرَةً مِنْ تَمْرِ الصَّدَقَةِ، فَجَعَلَهَا فِي فِيهِ، فَقَالَ النَّبِيُّ ﷺ: «كِخْ كِخْ! لِيَطْرَحَهَا، ثُمَّ قَالَ: أَمَا شَعَرْتَ أَنَّا لَا نَأْكُلُ الصَّدَقَةَ؟»

சிறுவர் ஹஸன் (ரழி) அவர்கள் ஸதகா பேரீச்சம்பழத்தை வாயில் போட்டபோது, நபி ﷺ அவர்கள் உடனே "சீ, சீ! (துப்பு, துப்பு!) நிச்சயமாக நாம் ஸதகாவை உண்ண மாட்டோம்" என்று தடுத்தார்கள். குழந்தைகளாக இருந்தாலும் ஹராமான உணவு உடலுக்குள் செல்லக் கூடாது என்பதில் பெற்றோர் விழிப்புடன் இருக்க வேண்டும். (ஸஹீஹ் புகாரி)

ஹழ்ரத் அபூதுஜானா (ரழி) அவர்களின் பேணுதல்கள்

ஹழ்ரத் அபூதுஜானா (ரழி) அவர்கள் பஜ்ர் தொழுதவுடன் விரைவாக வீட்டிற்குச் சென்று விடுவார். காரணத்தைக் கேட்ட நபி ﷺ அவர்களிடம் அவர் கூறினார்:

"என் வீட்டிற்குப் பக்கத்து வீட்டுக்காரரின் பேரீச்ச மரக் கிளை என் முற்றத்தில் சாய்ந்துள்ளது. அதில் உதிரும் பழங்களை என் பிள்ளைகள் எடுத்து உண்டுவிடக் கூடாது என்பதற்காக, அவர்கள் கண்விழிப்பதற்கு முன்பே அப்பழங்களை எடுத்து அண்டை வீட்டார் முற்றத்தில் போட்டுவிட்டு வருகிறேன்."

இந்த நேர்மையைக் கண்ட நபியவர்கள், அந்த மரத்தை அபூதுஜானாவுக்கே சொந்தமாக்க முயற்சி செய்து, பெரும் போராட்டத்திற்குப் பின் அந்த முனாஃபிக்கிடமிருந்து வாங்கி அபூதுஜானாவுக்குக் கொடுத்தார்கள். (தப்ஸீருல் பஹவி)

ஒரு திர்ஹம் ஹராம் கலந்தாலும்...

عَنِ ابْنِ عُمَرَ رَضِيَ اللَّهُ عَنْهُمَا، أَنَّهُ قَالَ: «مَنِ اشْتَرَى ثَوْبًا بِعَشَرَةِ دَرَاهِمَ، وَفِيهِ دِرْهَمٌ حَرَامٌ، لَمْ يَقْبَلِ اللَّهُ تَعَالَى لَهُ صَلَاةً مَادَامَ عَلَيْهِ»

இப்னு உமர் (ரழி) அவர்கள் கூறினார்கள்: "ஒருவர் பத்து திர்ஹத்திற்கு ஒரு ஆடையை வாங்கினார்; அதில் ஒரு திர்ஹம் ஹராமாக இருந்தாலும், அந்த ஆடையை அணிந்திருக்கும் காலமெல்லாம் அவருடைய தொழுகையை அல்லாஹ் ஏற்றுக் கொள்ளமாட்டான்." (நூல்: அக்பார்)

முடிவுரை: சுயபரிசோதனை செய்வோம்!

ஒரு முஃமினுடைய ஈருலக வாழ்வின் வெற்றி, அவனது உணவிலும் வருமானத்திலும் உள்ள தூய்மையிலேயே தங்கியுள்ளது.

நாம் வியர்வை சிந்தி ஈட்டும் வருமானம் மார்க்க நெறிக்குட்பட்டதா?

நமது வியாபாரத்தில், வேலையில் வட்டியோ, மோசடியோ, கலப்படமோ கலந்துவிடவில்லையே?

நமது பிள்ளைகளின் வயிற்றுக்கு நாம் கொண்டு சேர்க்கும் உணவு பரிபூரண ஹலாலானதுதானா?

குறைவான வருமானமாக இருந்தாலும் ஹலாலான உணவில் பரக்கத்தும், நெஞ்சில் நிம்மதியும், துஆக்கள் கபூலாகும் பெரும் பாக்கியமும் உண்டு.

யா அல்லாஹ்! எங்கள் உடலையும், உள்ளத்தையும், உணவையும், வருமானத்தையும், தொழுகைகளையும் முழுமையாக ஏற்றுக்கொள்வாயாக! சந்தேகத்திற்குரிய அனைத்திலிருந்தும் எங்களையும் எங்கள் சந்ததிகளையும் பாதுகாத்தருள்வாயாக! ஆமீன்!

தொகுத்தவர்.

மவ்லவி B.முஹம்மது ராஃபி ரஷீதி.

தலைமை இமாம். மஸ்ஜிதே முபாரக் கிருஷ்ணாம்பேட்டை அரக்கோணம்.

Cell : +91 90949 86824.

முந்தைய பதிவுகள் வாசிக்க 👇 கிளிக் செய்யவும்.

ஜும்மா பயான்கள்